De Vorsterman Bijbel

§ Dat .xi. Capittel.

1

⁺Maer alle daerde was van eenderley tale ende sprake,

+ A

2

Doen si nv reysden vant Oosten, vonden si een velt, int lant Sennaar, ende woonden aldaer,

3

Ende spraken tot malcanderen, Coemt, laet ons bacsteenen maken ende backense metten viere, Ende si namen bacsteenen voor steenen, ende lijm voor mortele,

4

ende seyden, Coemt, laet ons een stadt, ende eenen torren maken, wiens opperste aenden hemelreycke, ende dat wi ons eenen naem maken, eer wi verstroyt worden in alle landen.

5

⁺⁺ Doen quam die HEERE neder, dat hi sien soude die stede ende den torren, dien Adams kinderen timmerden

+ B

+ Belus nembroths sone coninck van Assirien.

6

Ende sprac, Siet, tis eenderley volc ende sprake, onder hen allen, Ende hebben dat begonst te doen, ende si en sullen niet aflaten, van alle dat si voorgenomen hebben te doen, tot dat zijt metten werc volbracht hebben,

7

Coemt dan laet ons neder dalen, ende aldaer haer sprake aldaer verwerren, op dat deen, zijns naesten sprake niet en verstae.

8

Ende also verstroydese die HEERE, van dier plaetsen in allen landen, ⁺ Ende si hielden op die stadt te timmeren,

+ Cheres nembroths sone deerste coninc van areten

9

Daer af heet haeren naem Babel, om dat aldaer vewerret wert alder landen tale Ende van daer heeftse die HEERE opt aensicht van allen landen verstroyt.

10

Dit zijn Sems geslachten. Sem was .c. iaer out, ende wan Arpharat .ij. iaer na de diluuie.

11

Ende Sem leefde na dat hi Arpharat wan .ccccc. iaer, ⁺ ende wan sonen ende dochteren.

+ C

12

Arpharat had gheleeft .xxxv. iaer, ende wan Sale,

13

Ende Arpharat had geleeft na dat hi Sale wan ^* .ccc.) ende .iij. iaer, ende wan sonen ende dochteren.

* the. vierhondert

14

Ende Sale had geleeft .xxx. iaer, ende wan Heber,

15

⁺ Ende Sale had geleeft na dat hi Heber gewonnen hadde .cccc. iaer ende wan sonen ende dochteren.

+ § Zoroaltes die vinder der swarter const

16

Ende Heber leefde .xxxiiij iaer, ende wan ^* Phalech)

* theb. peleg

17

Ende leefde na dat hi Phalech wan vier hondert .xxx. iaer, ende wan sonen ende dochteren.

18

Ende ⁺ Phalech) hadde geleeft dertich iaer, ende wan Reu,

+ theb. Peleg

19

Ende Phalech hadde geleeft na dat hi Reu wan .cc. ende negen iaer, ende wan sonen ende dochteren. ⁺

+ Hier stonden op die conincrijken der assirien der bemen

20

Ende Reu hadde geleeft ^* .xxxv.) iaer, ende wan Saruch

* the. xxxij.

21

Ende Reu had geleeft na dat hi Saruch wan cc. ende .vij. iaer, ende wan sonen ende dochteren ⁺

+ § Ninus zijns vaders beli beelt beual hi te aenbidden ende vermeerderde die afgoderie

22

Ende Saruch hadde geleeft .xxx. iaer, ende wan Nachor,

23

Ende Saruch had gheleeft na dat hi Nachor wan .cc. iaeren, ende wan sonen ende dochteren

24

Ende nachor had geleeft .xxix. iaer, ende wan Thare.

25

Ende Nachor had geleeft na dat hi Thare wan .c.xix. iaren, ende wan sonen ende dochteren.

[p. a5v]

26

⁺Thare hadde geleeft tseuentich iaer, ende wan Abram, ende Nachor, ende Aram.

+ D

27

Ende dit zijn die geslachten van Thare, Thare wan Abram, Nachor, ende Aram Maer Aram wan Loth,

28

Ende Aram sterf eer zijn vader Thare in zijns vaders lant te ^* Hur) in Caldeen

* the. ur Vr, dat is, licht twort oock voor vier genomen, hier ist een stadt.

29

Ende Abram ende Nachor namen wiuen, Abrams wijfs naem was Sarai, Ende Nachors wijfs naem was Melcha Arams dochtere, die welcke Aram vader was van Melca ende Iesche

30

Maer Sarai was onuruchtbaer, ende en hadde geen kinderen,

31

Ende doen nam Thare sinen sone Abram, ende Loth zijns soons Arams sone, ende Sarai zijns soons Abrams huysurou, ende hi voerdese van ^* Hur) wt Caldeen, dat si int lant Canaan souden gaen, Ende si quamen te Aran, ende si woonden aldaer,

* the. Vr

32

Ende Thare dagen werden twee hondert, ende vijf iaer, ende sterf in Aran.

§ Hoe God Abram beual wt sinen lande te reysen ende hem een belofte gaf, ende Abram in Egypten quam, ende zijn huysurouwe hem ghenomen wert, ende wederom ghegheuen door Gods beuel.