De Vorsterman Bijbel

§ Dat .iiij. Capittel.

1

⁺ENde Adam ^* bekende) zijn wijf Eua, ende si ontfinc ende baerde Cayn, ende seyde ^* Ic heb beseten eenen mensche door Godt)

+ A

* the. besliep

* the. Ic hebbe vercregen den man des HEEREN.

2

Ende noch baerde si, Abel sinen broeder, Ende Abel wert een schaepherder, Ende Cayn een ackerman.

3

Ende tgebuerde na ^* veel) dagen, dat Cayn den HEERE offer brochte, vanden vruchten der ^* aerden)

* th. somige

* h. des velts

4

Ende Abel brocht ooc vanden eerstgeborenen zijnder schapen, ^* ende van haeren vetten, Ende die HEERE aensach tot Abel, ende tot sinen offer,

* § Kayn heet datmen crijcht oft ouercoemt

5

Maer tot Cayn ende tot sinen offer, en sach hi niet. Doen wert Cayn zeer gram, ende zijn ghelaet verstelde hem,

6

Ende [kolom]

[afbeelding]

die HEERE sprac tot Cayn, Waerom verstoordy v? ende waerom verstelt hem v aensichte?

7

Ist soo niet, ^* hebdy wel ghedaen, en suldy dat niet ontfanghen? Maer hebdy qualic gedaen so sal terstont v sonde inder dueren wesen, Maer haer bewechenis sal) onder uwe macht wesen, ende ghi sult hebben heerscappie ouer haer.

* the. waert ghi ghoet so waert een offer maer en zijdy niet goet, so sal de zonde liggen totter openbarige Maer laetse

8

Ende Cayn sprac tot sinen broeder Abel ^* Laet ons daer buyten gaen) Ende doen si opten velde waren, stont Cayn op tegen sinen broeder Abel, ende sloech hem doot.

* ten is niet int hebree.

9

Ende die HEERE seyde tot Cayn, Waer is v broeder Abel? Ende hi antwoorde, Ick en weets niet, ⁺ Ben ic mijns broeders bewaerder?

+ B

10

Ende hi seyde tot hem, Wat hebdy gedaen? Die stemme van ws broeders bloet, roept tot mi vander aerden,

11

Nv daerom suldy vermaledijt zijn opter aerden, die haeren muyl open gedaen heeft, ende ws broeders bloet, van uwen handen ontfangen,

12

als ghi ^* die bouwen sult, so en sal si v haer vruchten niet geuen) Onstadich ende vluchtich suldy zijn opter aerden.

* h. den acker bouwen sult so en sal hi v voort zijn vermueghen niet gheuen

13

Cayn seyde tot den HEERE, Mijn boosheyt is meerder, dan ^* ic verghiffenisse verdienen mach)

* h. si mi vergeuen worden mach

14

Siet, ghi sult mi huyden verdriuen van daensicht der aerden, ende ick sal mi voor uwe aensicht verberghen, ende sal onstadich ende vluchtich zijn opter aerden, So wie mi vinden sal, sal mi dootslaen.

15

Die HEERE sprac tot hem ^* Ten sal so niet zijn, Maer) so wie Cayn dootslaet, dat sal seuenfout gewroken worden, Ende die HEERE sette een teeken aen Cayn, dat niemant hem en versloege

* h. tsal also zijn, dat

[p. a3r]

wie dat hem vonde,

16

Also ginc Cayn vanden aensichte des HEEREN ende woonde in tlant vluchtich, ⁺ aen die side Eden tegen den oosten.

+ Nod heet vluchtich

17

Ende Cayn besliep zijn wijf, ende si ontfinck, ende baerde Enoch, Ende hi stichte een stat, die naemde hi na zijns zoons naem Enoch,

18

Enoch wan Prad, Prad wan Mauihael, Mauihael wan Mathusael, Mathusael wan Lamech.

19

⁺Lamech nam .ij. wiuen, die een hiet Ada, die ander Sella,

+ D

20

Ende Ada wan Iabal, van hem quamen die in tenten woonden, ende vee hadden,

21

Ende zijn broeder hiet Tubal, van hem quamen die met herpen en met pipen omgingen,

22

Dese Sella wan ooc (te weten) Tubalkain, die wert een constenaer in alle meesterlike stucken van metaelwercke, ende van yser, Ende Tubalkains suster hiet Naema.

23

Ende Lamech sprac tot sinen wiuen Ada ende Sella, Hoort mijn stemme Lamechs wiuen, laet mijn reden tot uwen ooren comen, Ic heb eenen man verslagen mi tot eender wonden, ende een iongelinc tot mijnder plagen

24

Cayn sal seuenwerf ghewroken worden, maer Lamech .vij. ende .lxx. werf.

25

Ende Adam besliep noch zijn wijf, ende si baerde eenen sone dien hiet si Seth, want God heeft mi (sprac si) een ander zaet geset voor Abel, den genen die Cayn ghedoot heeft,

26

Ende Sed voede ooc eenen sone, ende hiet hem Enos, ^* dese beghonste) den naem des HEEREN aen te roepen.

* th. ter seluer tijt begontsmen

§ Hier wort Adams geslachte verhaelt, ende tgetal der iaren der mannen van sinen gheslachte tot Noe toe.