Refereyn,
Op de Vraech: Wat oeffeningh is elck best en nodighst voor 't ghemeen.
GElooft sy onsen Godt, door sijnen een'gen Soon,
De welck hy alle macht, den selven heeft ghegeven;
Door Christus onsen Heer, moghen wy door sijn Throon,
Comen met ons ghebeen, en wachten goeden loon:
Want Doot, Duyvel en Hel heeft hy van ons verdreven,
Soo dat vrywilligh wy mooghen sonder beven
Comen na onsen Godt, als eenen Vader goet,
Al wat wy door 't gheloof, de hoop, en liefde even
Versoecken door ghebeen, Godt sal door Christi bloet,
Dat selve gheven ons, al wat ons bidden doet:
Ia dickmael geeft hy die, die van hem wat begeeren,
Veel meer als daer sy om den Heer vallen te voet.
Hy neemt die selve aen, als wetten t'sijnder eeren,
Die met verslaghen geest, bidden den Heer der Heeren,
't Sy voor haer naesten (of) voor haer persoon alleen,
Godt wilt verhooren haer, ghelijck de Schrift gaet leeren:
T goet ghebedt is elck best, en nodighst voor 'tghemeen.
Wat heeft het goet ghebedt wel goet aen dien gebaert,
Den geen die in't ghebedt oeffenden met ghedachten,
Wanneer het maer en was dat zondens boosen aert,
Godts Kindren waren in de sonden quaedt beswaert,
Wanneer sy int ghebedt, oeffenden dach en nachten,
Dat sy den Heere Godt, ghebeden vooren brachten,
Vyt een nedrigh ghemoet, van dats haden misdaen,
Wat dede Godt? hy deed lijck hy duysent gheslachten,
Gesegent heeft, die hem van herten bidden aen,
En noch door het gebedt blijven die landen staen.
Door oefningh des ghebets blijft al dinck noch int wesen:
Want om des goedts ghebedt, der vroomen onbelaen,
Sy oeffenen 't ghebedt, en bidden Godt in desen,
Dat hy haer hooren sal, dat hy sal zijn ghepresen
Van haer in eeuwicheyt, en oock alle de geen
Die van hem zijn ghedwaelt, dat sy hem moghen vreesen
'T goet ghebedt is elck best, en nodighst voor 't gemeen.
|
|
Auteursrechtvrij