Vlissings redens lust-hof, beplant met seer schoone en bequame oeffeningen



[Folio Kk2v]
Hasersoude. Liedt op den sin, Die Godt heeft tot sijn hulp, gheen dingh hem hinder doet.
En gaet na de stem: Van den Lof-sangh Maria. 1. DIe hier vromelijck vecht, En hout Godts Wetten recht, In al sijn hart en sinnen, Die is verseeckert klaer, Dat hy door Gods handt swaer, Ghewis sal overwinnen. 2. Al waert ghy in doodts noot, Van uwen Vyandt groot, Noch hebt ghy niet te vreesen: Want die het quade vliet, En op sijn Hulper siet, Sal niet verlaten wesen. 3. Gheen hinder, noch gheen druck, Gheen straf, noch ongheluck, En sal haer over komen, Want een genaden wolck, Beschermt Gods Heyligh Volck, Voor lasterlijcke stroomen. 4. O over groot ghenaet, O hulpe die vast staet, Ghegront op Godt en Heere, Die in sijn handen sluyt Sijn over schoone Bruyt, Bevrijt haer voor 't verseeren. 5. Want die 't met lieft volbracht, Vast na haer komste wacht, Nae die vroomlijck volharden, Te brenghen in sijn troon En oock des levens kroon Sal haer tot loon ghewarden. Met Lieft volbracht. Van Dobbe.