Vlaerdings redenrijck-bergh

[fol. Ccc2v]

Dordrecht.
De Fonteynisten.

REYN GENEVCHT

[fol. Ccc3r]

Inkomste
Van de Kamer van Dordrecht,
De Fonteynisten.

HEur Machtigst' vvouden meerder macht,
En machtichst zijn van allen;
Daer onstond' uyt die macht tvvedracht,
Doen moest het Rijck vervallen.

Vlaerdingh tot Dordrecht.

WEL eer hielp ick Dordrecht in de Inlandtsche stryden,
Met Lichaem ende Ziel haer Maghedom bevryden:
Nu koomt sy mijn Red'rijck in haer Bruydschap en feest
Door u, ô Reyn gheneucht, vermaken weer den geest.
Des zydy wellekom ghy (haer) vrolicke Mannen,
Die 'tgeneuchlick aen brengt voor't twistig samen spannen,
En met 'sHemelsch Poët, door vreugde, zoeckt uit 'tLandt
te jagen droeve twist, die twistig t'samen spant.

Dordrecht tot Vlaerdingh.

GElijck de Griecken zijn vermaert in vele Landen
door haer deftig beleyt, vroom, wijs, kloeck in verstanden,
Sult ghy, ô oude Stadt, prijs ende eer ontfaen
in ander Eeuwen noch: want gy nu hebt bestaen
een heerlick treftig werck, het welck na mijn bedencken
noyt niemant heeft bedacht, want het streckt om te krencken.
Haet, twist, afgonst, eerzucht, burger-rijch ende moort,
Dit al sal houwen op, somen met vlijt na-spoort
'tgeen op u vraeg tot antwoort sal worden gegeven;
Want so elck recht boet doet, afstaende van't quaet leven,
Sal Godt alle onvree haest wech nemen van hier,
gevend' zeeg'rijck gonst: Lieft vree en goey manier,
Want hy zulx heeft belooft, de schrift getuycht dat klaerlijck:
Dies zy u Vlaerding vroom, danck, lof, eer en prijs waerlijck.
Danckelick dancken wy u van't jonstich wellekom t'samen,
Om dat gy Aensiet Liefd', wy met Reyn geneucht quamen.

Reyn genevgt.