[Laestmael int kriecken van den dach]
Op de vvijse: Bettheken voer nae Bethelemoer.
LAestmael int kriecken van den dach
Soo ick uyt mijn Venster lagh,
Mijn kleeden, mijn kleeden,
Een aerdich diertjen van verr’ ic sach
Tot mijn aen komen treden.
Dit Maechdelijns pruyckje stont so net
Met Parrelen-snoertjens dicht beset,
Wiens haare, wiens haare,
Op ’t hooghe voor-hooft gheblancket
Met Gout door-vlochten ware.
Ick nam dit Deerntjen by der hant
En zey: treed’in mijn Liefje, want
Stracks heeftse nae de wys van ’t Lant
My met een groet bejeghent.
Sy sach mijn lachende dickmaels aen,
Want ick heb uyt haer ghesicht verstaen
Dat zy daerom alleen quam gaen
Te worden uyt gheschildert.
Ick say Goddinnetjen sit dan daer
Terwyl maeck ick mijn rietschap klaer
Soet Meysjen, soet Meysjen,
V vlechjens kronckelen door malkaer.
Op ’t blancke bloosende vleysjen.
Ick nam d’anleggher by den steel
En streeck op ‘t toe-bereydt Penneel,
Ick dacht wat, ick dacht wat,
Dat haer de reuck mijn’s Olye eel
Tot een onlust ghebracht hadt.
Doch stracks sach ick de schortingh weer,
Haer buyckje ronde wat te seer,
Ick streeckse, ick streeckse,
Eerst diept ick, daernae hoogh ick weer,
Op staende voet gheleeckse.
Als ick haer nu ghedootverft hadt
Was ick mijn eyghen Konst weer sadt,
Al lachende, doch niet sonder dat
Dus wilt ghy weten de rechten naem
Van’t reyne Joffertjen, inde kraem
Gaet soecken, gaet soecken,
Want ick my haer te noemen schaem
Om d’eer van alle doecken.
Ghy Prince en Princesje mee,
Soeckt d’elfste Letter int A B C,
Daer staetse, daer staetse,
Denckt noyt verheucht die ’t noyt en dee,
Daerom recht vroom ick laetse.
Een voor Al.
|
|
Auteursrechtvrij