Veelderhande gheestelicke liedekens

C Na de wijse. Therte vol rouwen gheperst door douwen.

VUt swaer benouwen
Met vast betrouwen
Roep ick tot v Heer sonder vermijden
Aensiet ons vianden nv ten tijden
Hoe sy raet houwen, sonder verflouwen
En stellen stricken op alle zijden
Om ons te brenghen in druck en lijden
Wilt ditte schouwen
Met uwen ooghen wt shemels throone
En ons van rouwen
Uerlossen door v liefde schoone
Gheeft ons v rijck te loone.

Sy legghen laghen
Uan daghe te daghen
So wy bemercken in dese stonden
Ghelijck een hert die van den honden
Uermoeyt doort iaghen
Om dorsts verslaghen
Haect na een water seer diep van gronden
Also zijn dese oock nv beuonden
Om wt te vaghen
Gods wtuercoren in alle ghehuchten
Sy roepen en claghen
Maer God sal in blijschap keeren tsuchten
Als wy tot hem vluchten.

Tis om beweenen
Dat sy als beenen
Uerhart met nijde so zijn ontsteken
Want diemen nv van Gods woort hoort spreken
Wt oprecht meenen
Dien salmen vercleenen
Soot openbaer nv is ghebleken

[p. 383]

 

Maer Heer ghy weet al haer loose treken

 

En anders gheenen

 

Ghy moecht haer voornemen haest verpletten

 

Certeyn niet eenen

 

En isser die ons mach schaen of letten

 

Wilt God hem voor ons setten

 

 

 

Heere verheuen

 

U wil ick aencleuen

 

En mijn betrouwen alleen op v stellen

 

Al zijnder veel die ons nv quellen

 

Willet vergheuen

 

Die nv ons leuen

 

Met ghewelt ter neder willen vellen

 

Al hoortmen haer nv veel wonders rellen

 

Tis al bedreuen

 

Door onwetentheyt Heere der Heeren

 

Lacen sy sneuen

 

O ghenadich God wiltse bekeeren

 

Ende haer v weghen leeren.

 

 

 

God der heyrscharen

 

Die v dienaren

 

Noyt in haren noot en hebt verlaten

 

Coemt ons o God nv oock ter baten

 

En wilt ons sparen

 

Maer openbaren

 

Uwen wille seer soet bouen maten

 

Op dat wy v woorden moghen vaten

 

En voort verclaren

 

U goetheyt die ghy ons quaemt bewijsen

 

Die ons sondaren

 

Wter doot in dat leuen hebt doen rijsen

 

Dus wilt God altijt prijsen.

 

 

 

Prince God machtich

 

Die ons erfachtich

 

In v rijcke door Christum wildet maken

 

Op v so wil ick al mijn hope staken

 

Maect ons deelachtich

[p. 384]

 

Uwen gheest crachtich

 

Want na v goetheyt Heere wy haken

 

U liefde die doet alle droefheyt slaken

 

Sijt doch ghedachtich

 

U creaturen in haer allenden

 

Wy roepen clachtich

 

Tot v om hulpe, Heer wilt tot ons wenden

 

Ende ons uwen gheest senden.