Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. O Troylus edel Prince.
VUt dieper noot roep ick Heer aenhoort
Want acht ghy op onse sonden naer Dauids schrijuen
Of ist dat ghy v rechtueerdicheyt op ons oorboort
Wie salder o Heere voor v staende blijuen.
O Heere en wilt met ons in dijn oordeel niet gaen
Want gheen mensche en sal ontschuldich zijn voor v aenschijn
Maer wilt v ooghen van bermherticheyt op ons slaen
Weest ghedachtich dat wy maer stof, asschen, en eerde zijn.
In sonden zijn wy ontfanghen, en in sonden ghebaert
Ende vleeschelick hier onder vercocht tot allen stonden
Ga naar margenoot+ Dus zijn wy der ydelheyt onderworpen sy v verclaert
Maer by v o Heere is vergeuinghe der sonden.
Door Adam zijn wy so seere ghecorrompeert
Dat wy van ons seluen niet goets en konnen ghedincken
Maer Heere ghy hebt v seluen tot ons verneert
Ende ons eenen nieuwen sin willen schincken.
| |
[pagina 385]
| |
Maer noch bestrijt ons de weerelt, met haren listighen raet
Ende die sonde ouerualt ons lieden noch wel also seere
Dat hem niemant en can beroemen dat hy is sonder misdaet
Maer wy hopen op v bermherticheyt Heere.
Mijnen geest die is in my met grooter droefheyt beuaen
Als ick mijn sonden ouerdincke, O Heere ghepresen
Daerom roep ic tot v wilt my inder noot bystaen
Want van v so moet Heere mijn salicheyt wezen
O God vader ick bid v door Christum ghebenedijt
Ondersoect mijn herte, wilt my v wegen leeren
Bewaert my dat ik niet en dole tot eeniger tijt
Leyt my op den eewigen wech Heere der Heeren
O Heere ghy hebt ons van stof der eerden gemaect
En wilt dat werc uwer handen niet versmaden
Want ghy zijt voor ons ghestoruen door v liefde die vierich blaect
O Heere wilt ons verlossen van allen quaden.
O Christus ghy hebt ons met uwen bloede ghecocht
U ontfermherticheyt en is niet om gronderen
Ende hebt de doot, duyuel ende helle tonder brocht
Dus sullen wy met v in eewicheyt triumpheren.
Uerblijdt v mijn siele, weest niet meer met droefheyt belaen
Noch en wilt niet vreesen voor der sonden beswaren
Want hy heeft die sonde int vleesch verdoemt wilt dit verstaen
Dat moet den vloeck dragen, ende inder eerden varen
Maer en wilt om ws vlees verghaen niet cleynmoedich zijn
| |
[pagina 386]
| |
Want God die salt op wecken, dus wilt vruecht baren
Dan suldy met v lichaem aenschouwen Gods claer aenschijn
En also tsamen den lof des Heeren verclaren.
|
|