Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 309]
| |
Sy verkondighen dat voorwaer
Sy singhen en sy trecken
Met haren soeten sanck
So menich mensche sy wecken
Die gheslapen hebben so lanck
Die wlen daerom pruylen
En maken so groot misbaer
Haer regimenten moeten vuylen
Daeromme zijn sy so swaer
Die Exter des ghelijcken
Haer klappen wort nv veracht
De kockmeeuwen moeten wijcken
Die nachtraue wort nv belacht.
Sy ghinghen haer versellen
Al aen den Arent stout
Ende sy ghinghen hem vertellen
Haer verachtentheyt menichfout
Een edict dedemen schrijuen
En lesen int openbaer
Dit is Conincx belieuen
Op een correxie swaer.
Die singhen wil moet singhen
Als wlen en Exteren doen
Gelijck kockmeuwen en nachtrauen klingen
Tonueren na haer fatsoen
Dit mandement misprijsen
Die fiere Nachtegael
Die knueterkens ende die Sijsen
Die woutvoghelkens altemael.
Want sy en willen niet sneuen
Sy en laten haer singhen niet
Daerom so worden sy verdreuen
En komen int swaer verdriet
Rijck God wilt doch verlichten
Den Arent in zijn verstant
dat hy den soeten sanck wil stichten
Uoor der schauuyten ghestanck.
|
|