Veelderhande gheestelicke liedekens

C Een ander.

NU drijuen wy den Paus heraus
Wt Christus kerck en Godes huys
Daer in hy moordelick heeft gheregeert
En ontallick veel sielen veruoert.

Haest v hier wt ghy verdoemde sone,
Ghy roode bruyt van Babylon
Ghy zijt den grouwel en Antechrist
Uol loghen en moort, en erghelist.

Dynen aflaets brief bullen en decreet
Light nv verseghelt int secreet
Daermede staelt ghy der weerelt haer goet
En schendet daer door oock Christus bloet

Den Roomschen God is wtghedaen
Den rechten Paus wy nemen aen
Dat is Gods hoecksteen en crist
Op dien dat zijn kercke getimmert ist

Hy is den hoochsten priester saert
Aenden cruyce dat hy gheoffert waert
Sijn bloet voor onsen sonden vergoot
Rechten aflaet wt zijn wonden vloot.

Sijn kerck hy door zijn woort regeert
God vader selfs ons instrueert
Hy is dat hooft der Christenheyt
Hem sy lof prijs inder eewicheyt.

Ons koemt eenen frayen somer toe
Uerleen ons Christus vrede en verhou
Uerleent ons Heere een salich iaer
Uoor Paus en Torcken ons bewaer