Veelderhande gheestelicke liedekens

[p. 310]

C Na die wijse alst beghint.

NU hoort een goet nieu liet
Groote gracie is ons geschiet
O mensche en acht ghy dit niet
Boort op v hooft en siet
Wy zijn verlost wt swaer verdriet
God heeft zijn volck vercoren
Wy worden nv nieu gheboren

Laet ons te Bethleem gaen
Als ons die Enghelkens doen vermaen
Twarachtighe woort ontfaen
En bidden dat wijt mogen verstaen
En latent ons niet ontraen
Laet ons malcanderen daer leyden
En laten die beesten aender heyden.

Den Enghel heeft zijn wiecken ghesleghen
Ick sie stof van de Schriftuer weghen
Die leecken hebbense oock verkreghen
Sy doet haer herten seer beweghen
Die vroukens neersticheyt pleghen
Den gheest verwondert ons al te male
Elck hoort zijn eyghen tale.

Den os is wt ghelaten
Hy loopt in alle straten
Hy wil hem tonswaert saten
Wilt hem trouwelick aen vaten
Hy koemt ons oock te baten
Hy stont so langhe ghesloten
Dat heeft den Heere verdroten

Den Leew hem openbaert
Weest daer niet af veruaert
Al wort hy wijt vermaert
Hy is van sulcken aert
Die verrijsenis hy ons verclaert
Siet dat v niemant af en keere
Warachtich het is die Heere.

Den Arent heeft hooch gheuloghen

[p. 311]

 

Gods gracie heeft hem gheboghen

 

Hy wil ons de liefste toghen

 

Hy thoont wat hy heeft ghesoghen

 

Al en moghen zijt niet ghedoghen

 

Wilt by Gods woorden blijuen

 

En laet die gheleerde kijuen.

 

 

 

Dit schenck ick v voorwaer

 

Tot desen nieuwen iaer

 

Susters ende broeders alle gaer

 

Het belieft den Heer dats klaer

 

Ureest niet cleynmoedighe schaer

 

Want wil God met ons strijden

 

Wat schade ist dat wy lijden.