Veelderhande gheestelicke liedekens

C Een ander.

⁺ ICk hoorde de basuyne blasen
⁺ Seer verre hoorde ick tgheschal
In Ierusalem in Edom basen
Die boden roepen ouer al
Haer gheluyt gaet in mijn versinnen
⁺ Maect v ter bruyloft ghereet
Al die den Coninck beminnen
⁺ De poorte is open gaet binnen
Uerciert v doet aen dat bruyloft cleet.

⁺ O Syon wtghelesen
Hebt ghy haer stemme niet ghehoort
En wilt niet omhoorich wesen
⁺ Maer wilt ontfanghen des Heeren woort
Ghy hebt ghenade ghecreghen
Neemt waer het wort v gheseyt
⁺ Rasch maect v op die weghen
Eer ghy met Babylon wort ghesleghen

+ Apoc.8.

+ Apo.19.

+ Mat.22

+ Ioan.10

+ Heb.13.

+ Apoc.9

+ Apoc.9

[p. 257]

 

Haest v seere niet en verbeyt.

 

 

 

Dat teecken wort v ghegheuen

 

Dat Ezechiel int neghenste staet

 

Des heeren knechten worden beschreuen ⁺

 

Die daer volbrenghen des Heeren raet ⁺

 

O Syon besiet uwen verclaren ⁺

 

U ghetal is schier veruult

 

Uan die haer leuen niet en sparen

 

Ghecocht zijn sy vander eerden ⁺

 

Tlam heeft betaelt voor haer de schult.

 

 

 

O ghy Iacobs wormkens wtuercoren ⁺

 

U vergulden ros coemt nv met macht

 

Wilt nv v hooft op voeren

 

Dat ghy des Heeren toecoemst verwacht ⁺

 

Wat wilt ghy een ander aenuanghen

 

Of ghy den Coninck niet crijghen en sout

 

Dat wee heeft v beuanghen ⁺

 

Hieromme is v verlanghen

 

Als een vrou int baren menichfout.

 

 

 

Staet op Syon wapent v leden

 

Maect v totten strijde bereyt

 

Eenen anderen wech moet ghy in treden ⁺

 

Maer eens menschen voetstappe breyt

 

Haren inganck licht in mijn vermeeren

 

Daer ghy v erfdeel sult ontfaen

 

En vreest niet al zijt ghy teedere

 

Uoor den Arent met syne vederen

 

Hy sal v met zijn clauwen slaen.

 

 

 

Den draeck is comen opder aerde

 

En is gheuanghen met grooten nijt

 

Want die vrouwe diet manneken baerde ⁺

 

Is haer benomen des heeft hy strijt

 

Om teghen haer saet te vechten

 

Sijt goets moets en twijfelt niet

 

Onsen leytsman coemt hier te rechten

 

Oordeel houden met syne knechten

 

Hy salse verlossen wt al haer verdriet. ⁺

+ Ezech.9

+ Mat.21

+ Luc.28.

+ Apoc.14.

+ Esa.41

+ Apoc.22.

+ Ioan.10

+ Luce.11

+ Apoc.12

+ Apo.12.

[p. 258]

 

O wachters op Syons tooren

 

My dunct dat sweert is bereyt

 

Laet v basuynen noch hooren

 

Of yemant in Syon in ruste leyt

 

Dat sy moghen ontwaken

 

Uan haren slaep opstaen

 

Dat sy haer onschult niet en maken

 

Als die Heer sal comen ter wraken

 

Hy sal de wederspannighe slaen.

 

 

 

O boosen aert ghy en wilt niet hooren

 

Ghy maect v onschult al ghelijck

 

De wachters segghent v wel te vooren

 

U naect de doot seer iammerlijck

 

Den vrede Gods spreect ghy incluyten

 

Maer tbloet coemt op v hooft

 

Den Poortier beghint te sluyten

 

Ende ghy sult blijuen buyten

 

Dat ghy de waerheyt niet en ghelooft.

 

 

 

O moordadich saet wat gaet ghy maken

 

Gheslachte van Cain ghy brenght ter doot

 

Des Heeren schaepkens sonder snaken

 

Wert dobbel betaelt in uwen schoot

 

Die doot coemt nv te peerde

 

Wy hebben v eynde ghesien

 

Dat sweert gaet ouer deerde

 

Daer ghy mede ghedoot sult weerden

 

De helle en sult ghy niet ontulien

 

 

 

Den tijt is hier om te mayen

 

Want de boosheyt heeft hier douerhant

 

Daer en is schier gheen plaetse om te sayen

 

⁺ Dat oncruyt dat vult dat lant

 

Den somer is schier gheleden

 

Men hoort des trompetten ghepijp

 

⁺ Die spotters verachten den vreden

 

⁺ Tis tijt die persse te treden

 

Slaet aen v seysen den oogst is rijp.

 

 

 

Den Heere sal den voghelen een maeltijt bereyden

+ Mat.13

+ Pet.15

+ Apoc.14

[p. 259]

 

Te brassen in Edom so ick las

 

Want tegens der Princen der Coningen beyden

 

Coemt alle ghy voghelen versaet v ras

 

Wilt vanden Lansheeren vleesch v voeden

 

So sy deden so wert haer ghedaen

 

Ende ghy knechten weest vroom van moede

 

Wascht v voeten inden goddeloosen bloede

 

Desen loon sullen ons roouers ontfaen.

 

 

 

Staet op Ierusalem wilt v bereyden

 

Ontfanct v croone aenschout v rijck

 

Wilt v tenten wijt wt breyden

 

Ontfanct v kinderen alle ghelijck

 

Uwen Coninck coemt om te bereyden

 

Dijnen loon brengt hy voor haer pleyn

 

Hy sal hem in v verbleyden

 

Wy sullen in zijn glorie weyden

 

Uerblijt v Sion met Ierusalem reyn.

 

 

 

Uerblijt v met iuechden met vruechden

 

Speelt op de harpe een nieu liet

 

Wilt v in onsen God veriuechden

 

Ghy alle die dese wrake siet

 

Die Heere coemt om betalen

 

Om te wreken ons alder bloet

 

Sijn gramschap beghint te dalen

 

Wy verwachten de laetste schalen

 

O ghy bruyt gaet uwen bruydegom te gemoet.