Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Een ander. GOd die voor ons sorghe draecht Also ons Petrus heeft beschreuen Hy heeft zijnen eenighen sone ghewaecht Om ons te brenghen van tsteruen int leuen Wiens doot alleene ons heeft ghenesen Wiens roode bloet ons heeft verlost Wiens verrijsenisse also wy lesen Heeft des duyuels macht geheel tonder brocht. Gheeft ons hier af tghelooue bloot Tghelooue dat is v gheuen alleene Wy souden segghen meten Apostelen groot Sterckt ons ghelooue Heere het is so cleene Maer dat ghebet en waer niet reene Het fondament en isser niet Want Christus die dat is al sonder meene [pagina 161] [p. 161] Ons voldoender en ghenoecht ons niet Hy heeft nochtans voor ons voldaen Ende hem inde doot door liefde ghegheuen So datter niet meer en dient toe ghedaen Dan dat wy int ghelooue sullen leuen Maer bouen dien so willen wy neuen Minghen ons eyghen verdiensten groot Waer door wy ons belouen deewich leuen Ende maken gheheel Gods gratie bloot. Nochtans als een onweerdich cleet Sijn al ons rechtueerdicheden Niet weerdich met al ons wercken breet Een huerken taenschouwen dat opperste leuen En al ons lijden hier beneden En ghelijct niet by de glorie Gods Oock in ons lijden die verduldicheden En hebben wy van ons niet, maer van Gode. Wat willen wy ons beroemen dan Uan die gaue Gods wiens eere wy rouen Ghemerckt dat niemant de wet en can Uolbringhen door zijn eyghen vermoghen Ende al waert oock so ten waer gheen loghen Die gheheele Wet en helpt ons niet Al hebben wy ghedaen al dat wy moghen Noch zijn wy onnutte knechten somen ons bediet Laet ons nv met Paulus voort aen Int cruyce Christi alleene berommen Want daer en is gheenen anderen naem Dan den naem Christi den mensche toecommen Daer wy ter salicheyt door moghen commen Hy is alleene ons Aduocaet Hy is den wech wy en hebben gheen rommen Totten vader also ons beschreuen staet. So moeten wy opt ghelooue staen Want door tghelooue coemt ons die bate Indien op dat wijt wel verstaen Dat werckende zij door charitate [pagina 162] [p. 162] Niet iuyste na de selue mate Des werelts diemen ons voor ooghen leyt Want daer den gheest is dit elck wel vate Daer is die vrijheyt so Paulus seyt. Prince die ons rechtuaerdich maeckt Door ons ghelooue in Christus verrijsen Wie te vergheefs heeft die doot ghesmaeckt Den ghenen die haer rechtuaerdich prijsen Doet ons ghelooue so beclijuen Door liefde tot onsen naesten een paer Op dat wy v alleen den lof mogen toeschrijuen Niet achtende op ons wercken een enckel haer. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij