Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse: Uanden lustelicken Mey.
GHy Christen geesten weest nv verblijt
En wilt vrolick ontwaken
Ons is gheboren des seker zijt Ga naar margenoot+
Ons verlosser voor alle saken
Dus wilt hem lof prijs en eere bien
Hy heeft ons ellende aenghesien
Daer wy so deerlick in laghen
Onsen druck compt hy veriaghen.
Abrahams beloefte is nv volbracht
Wt Iacob is opgheresen
Een sterre na dat hebben ghewacht
Doude vaders also wy lesen
Heylich heylich is hy tgoddelick saet
Emanuel een licht dwelck niet en vergaet
Dat inde duysternisse is ghecomen Ga naar margenoot+
Een licht tot onser vromen
Adams val heeft hy opgherecht
Dus laet ons synen lof vermonden
Onse sonden aen thoute des cruycen ghehecht
| |
[pagina 160]
| |
Ons ghenesende door zijne wonden
Hy is tbeghin, dmiddel en deynde me
Alpha ende o synen eewighen vre
Wilt hy ons minnelick schencken
Laet ons hem te louene ghedencken.
Laet ons louen den Heere groot
Die hem seluen heeft willen verneren
Te steruen voor ons den doot
Om dat hy onsen pays sou confirmeren
Dwelck hem oprechte liefde riet
Dus singt den Heere een loffelick liet
Al dat leuen heeft vercreghen
Looft den Heere in alle weghen.
Den oppersten Prince seer excellent
Loeft met Psalmen en ghebeden
Sijn goddelick woort zijt obedient
So coemdy inde hemelsche steden
Daer vruechde is sonder eynde claer
Die voor elcken bereyt is voorwaer
Die ter weerelt zijn woort beleuen
Sal hy zijn rijcke gheuen.
|
|