Veelderhande gheestelicke liedekens

C Na die wijse: Ick roepe v O Hemelsche Uader aen.

GOd heeft ons zijn Euangelium vroet
Ghegheuen om dat te lesen
Maer de werelt en acht sulcken schat niet soet
Want duer het vleesch en bloet
So en compt gheen goet, hier gheresen.

Ten is niet dan bouerije quaet
Die de werelt hier gaet bedrijuen
Al ofter gheen God inden hemel en saet
Een elck so omme gaet
Troost v volck desolaet, Heer mans en wijuen

Men vraecht nv na gheen oprechte leer
Ghiericheyt heuet douerhant genomen
De woeckerye is nv ter weerelt seer
Uerchiert met grooter eer
Men vermaent van God niet meer, tonser onvromen.

Ueel beroemen hem van dat Euangelium playsant
Maer weynich daer na leuen
Sy spotten noch voorwaer aen elcken cant
Duer haer groot onuerstant

[p. 158]

 

Met Gods woort vayliant, hoochste verheuen.

 

 

 

Nieu wetten bedencken sy alle daghe siet

 

Het zijn godloose netten

 

Na ghelt en goet, studeert dit ghediet

 

Donnoosele lijt verdriet

 

Duer tghewelt dat hier gheschiet, Heer wilt op ons letten.

 

 

 

De Christenen royen sy wt, door quayen raet

 

Den armen die moet noot lijden

 

Sy sullent noch beclagen hier te laet

 

Dat sy dat arm saet

 

So wreet en obstinaet, hier comen bestrijden.

 

 

 

Den armen wort verdreuen ouer al

 

Sijn sweet en bloet wort gheten

 

Sy crijsschen sy huylen, sy maken gheschal

 

Maer God betalen sal

 

Alle dit ghetal, groot int vermeten.

 

 

 

Men vraecht nv na God den Heere niet meer

 

Ghepresen wort ydele glorie

 

Dongherechticheyt heeft ghenomen den keer

 

Tbedroch is nv groot eer

 

Luegen en is schande meer, in elckx memorie.

 

 

 

Waer blijft nv broerlicke liefde groot

 

Die werelt is nv vol dieuen

 

Die trou ende tghelooue is doot

 

Met een elck cleyn en grott

 

Een elck slacht nv bloot, als die Dagon verhieuen

 

 

 

Die weerelt en wilt haer niet verstaen

 

Gods woort noch oock zijn leeren

 

Sy en hooren verstant noch ander vermaen

 

Dan eten en drincken saen

 

Met schattinge om te gaen, o Heere der Heeren.

 

 

 

Haer grootste conste is bancketeeren hoort

 

In boeuerijen studeren

 

Hier inne gaet sy wter maten wel voort

 

Thout al met huer accoort

 

Ualscheyt datmen oorboort, sonder cesseren

[p. 159]

 

Die blinckende sonne niet meer en can

 

Haer claer rayen laten blincken

 

Maer verliest haer schijn van nv voort an

 

Dus is te recht elck man

 

Bedroeft hier van, o God wilt v volck gedencken

 

 

 

De Mane en sterren zijn beroert hier by

 

Seer deerlick zijn sy in wesen

 

Sy souden der boosheyt gheerne wesen vry

 

Delementen roepen fy

 

Ouer sweerels afgodery, o Heere ghepresen.

 

 

 

Daer om compt nv Princelicken God

 

U gheloouighen tot v vlien

 

Uernielt dat eertrijck dat met v spot

 

Dat daer hout v volck sot

 

In dit Babels cot, laet den ioncxsten dach gheschien.