Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na die wijse: Die Mey is nv inden tijt met zijnen groenen blaeden.
GHelijck een tortelduyfken hem verhuecht
En in een wout gaet vlieghen
Mijn siel is droeuich sonder vruecht
Tghesicht wil my bedrieghen
Mijn herteken dat schept verdriet
Alst te recht sy seluen besiet
Dus wilt mynen druck verhooren
Ga naar margenoot+ Want veel geroepen maer weynich wtuercoren
Ghedenct dat daer gheschieuen staet
Dat by den wech is gheuallen
Die voghelen des hemels aten dat saet
Ga naar margenoot+ Dat bediet ons thert vol gallen
Wanneer ons dan die vyant quelt,
| |
[pagina 155]
| |
So zijn wy also seer onstelt
En dat saet blijft dan verloren
Wan veel geroepen maer weynich wtuercoren.
Hoe soet vallet saet in deser tijt
Ende wort so vele ontfanghen
Wanneermen daer op merckt al sonder respijt
So en heeftet gheen voortganghen
Want dat saet dat blijft alleen
Want het valt op eenen harden steen
En die sonne gatet versmoren
Want veel geroepen maer weynich wtuercoren.
Noch valt dat saet en groeyt oock wel
In doornen ende in bramen
Want eertment oogst so vergaget snel
Want het en dient niet te samen
Dan compt die werelt met haren lust
Wel hem die daer niet op en rust
Ten zijn niet dan distelen en doren
Want veel geroepen maer weynich wtuercoren.
Ghelijck als ons die schriftuer seyt
So en zijn wy niet dan assen
Wel hem Heere die ghy hebt bereyt
Daer sal dat saet in wassen
Dus bidt hem groot ende cleyn
Dat hy ons wil bouwen alleyn
So brenghet vruchten te voren
Want veel geroepen maer weynich wtuercoren.
Prince diemen niet af en sach gaen
Maria bloem van alle vrouwen
Die v sach onder den cruyce staen
Ende sterf voor ons vol trouwen
Wt liefden die hy ons bewijst
Ende daerna in gelorien verrijst
Bidt hem hy sal v verhoren
Want veel geroepen maer weynich wtuercoren.
|
|