Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. Die bloemkens staen schoon.
GHy Christenen en wilt v vertoornen niet Ga naar margenoot+
Int voorspoet der Godloosen
Noch en trect aen v gheen verdriet
Om tweluaren der boosen.
Want als tgras so sullen sy vergaen
En haestelick af ghesneden
Als groene cruyt so werden sy saen
Uerdorret en al vertreden.
Sedt uwen troost in God alleen
Keert alle dinck in duechden
Blijft in v lant, wilt alle ween
Al int ghelooue veruruechden.
In God hebt altijt uwen lust
Wat hy gheeft het sal wel smaken
In zijn weghen so weest gherust
Betrout hem, hy salt wel maken.
Uwe rechtueerdicheyt als een licht
Sal hy claerlick openbaren
Ghelijck die middach al verlicht
Sal hy onrecht verclaren.
Hout v aen God wat hy v schinct
En vertoorent v niet, swijcht al stille
Als uwen viant voorspoet vinct
Doende na zijnen wille.
En grimmet noch en toorent niet
Wilt goet voor arbeyt gheuen
Die God wacht in zijn lant bediet
Die quaet doet die wert verdreuen.
Laet noch om eenen cleynen tijt
Den godloosen onderwinden
Hy wert ghesocht breet ende wijt
Maer niemant en sal hem vinden.
| |
[pagina 152]
| |
Maer die saechtmoedighe dat lant
Met paeys besitten sullen
Al sonder der Godloosen verbant
Die rasen ende dullen.
Die quaden ouer den goeden raest
Als van sinnen benomen
Maer God houdt hem voor goet verdwaest
Want zijnen dach die siet hy comen.
Die Godloose die blooten haer sweert
Ende spannen alle haer booghen
Al om te quellen den goeden weert
Die hem tot duechden wilt pooghen.
Haer sweert sal in haer herte gaen
Haer boghen die sullen breken
Alle tquaet dat door hem wert ghedaen
Sal in haer herte steken.
Den Christen is beter cleyn goet
Dan hoopen goets der boosen
Want God altoos den weldoender behoet
Den arm die breect der Godloosen.
God weet wanneer hy sal bestaen
Den ontschuldighen te helpen
Sijn erue die sal veel langher staen
Dan zijn gulden schelpen.
Hem wert de sonde noch een verwijt
Al in quader tijt begheuen
Maer hem wert inden dieren tijt
Ghenoech ghegheuen, om by te leuen
Al warent Godloosen als schat
Seer hooghe al in die werelt verheuen
Ueel snelder dan een roose blat
Werdense als roock verdreuen.
Die godloose borcht gheerne tghelt
Dwelck hy gheerne behilde
Die rechtueerdighe is al vry ghestelt
Barmhertich ende milde.
Die van God wert ghebenedijt
| |
[pagina 153]
| |
Die sal besitten die erue
Maer die daer wert vermalendijt
Tis wel recht dat hijse derue.
Des menschen weghen zijn gheuoert
Uan God in zijn behaghen
Al valt hy, hy wort onberoert
In zijn hant wilt hy hem draghen.
Ick ben van ionckheyt worden oudt
Noyt en heb ick connen vaten
Den rechtueerdighen arm oft cout
Noch zijn kinderen verlaten.
Hy is barmhertich nacht ende dach
Al in Gods weghen ghetorden
Sijn saet sal oock al sonder gheclach
Ghebenedijt worden.
Wijct vanden quaden doende duecht
Ende blijft alle eewich leuen
O God die alle zijn heylighen veruruecht
En wiltse niet begheuen.
Eewich in eewich so blijuen sy
Int quade sullen sy verganghen
Die goede dlant besitten vry
Eewich al sonder verlanghen.
Die mont der Christen wijsheyt denct
Gheen onrecht en can hy clappen
Want Godt zijn wet int herte hem schenct
Ende bewegende zijn stappen.
Den Christen die Godloose ontsiet
Dat hy hem mochte dooden
Maer God die en verdoemt hem niet
Maer hy trect hem wt den nooden.
Uerbeyt op God in zijnen wech
Ghy sult dat lant besitten
Die Godloosen verstoot hy wech
Beschickt ten helschen pitten.
Der godloosen ick eenmael
Sach grouwelick van doene
| |
[pagina 154]
| |
Machtich groot rijck als admyrael
Ende als den lauwer groene.
Ick ghinck voort ouer ende siet
Ick sach ten allen inden
Ick vraechder na men vanten niet
Hy en was niet te vinden.
Weest onschuldich ende siet an
Naer die rechtuerdichede
Want dat leste van sulcken man
Is paeys ruste ende vrede
Die Godloose die sullen vergaen
Tsamen cleen metten grooten
Ten lesten en sal niemant staen
Maer werden wech ghestooten.
Der gherechticheyt ende salicheyt
Is van Godt ende onfermen
Hy wilse in alle dierbaerheyt
Uan ongheluck beschermen.
God salse helpen als hy seyt
In der Godloosen aenschouwen
En brenghen ons allen tot salicheyt
Want sy in hem betrouwen.
|
|