Veelderhande gheestelicke liedekens
(1558)–Anoniem Veelderhande gheestelicke liedekens–
Auteursrechtvrij
[pagina 144]
| |
Sonder vermijden
Ons ghenaect eenen soeten tijt
Met desen niewen Iare
So wilt nv vromelick strijden
Aen alle zijden, so zijn wy nv beurijt
Dus schept doch nv iolijt
Hier in dit aertsche crijt
Ga naar margenoot+ Ons is doch nv gheboren
Den Heere ghebenedijt
Hy is die voor ons strijt
Al heues die viant spijt.
Wt rechter liefde ient
Heeft ons den Uader ghegheuen
Sijnen soon verheuen
Daer door wy hebben ontfaen
Een blijschap excelent
Daer langhe af is gheschreuen
Waer door wy int leuen, vanden doot zijn op ghestaen
Hy is die rechte baen
Al die door hem in gaen
Die sullen salich wesen
Hy heeft voor ons voldaen
Want tis doch zijn vermaen
Ga naar margenoot+ Compt al die zijn belaen.
Alleen zijn woort ghelooft
En schout die Ipocryten
Die eyghen profyten
Sijn soeckende talder stont
Door haer woort ghy berooft
Want sy met appetijten
Gods schaepkens verbijten, door haren boosen gront
Maer houdt Godts verbont
Al wordy dan door wont
Wilt vast int woort betrouwen
So wordy gans ghesont
Al wat Schrifiuere vermont
| |
[pagina 145]
| |
Hout vast in uwen gront.
O Princelick engien
Wilt danckelick ontfanghen
Sonder verstranghen
Dit vrolick niewe iaer
En loeft den Heere midts dien
In allen soeten sanghen
Wilt altijt aenhangen zijn heylich woort eerbaer
En hebt doch gheenen vaer
Uoor dongheloouighe schaer Ga naar margenoot+
Die v den Heere wijsen
Te soecken hier oft daer
Sijn woort blijft alleen waer
En vreest doch niet een haer.
|