Veelderhande gheestelicke liedekens

C Na de wijse. Ick hadde een ghestadich minneken.

GOds liefde is groot van prijse
Die hy ons heeft betoocht
In deerste met aduijse
U ooren hier toe boocht
Adam van duechden verdroocht
Heuet Gods liefde vernomen
Een hope is hem voorcomen
Dus v al tot haer poocht.

Sy is oock claer ghebleken
In Abraham voorwaer
In die beloften onbezweken
Sachmen Gods liefde claer
In Isaac oock daer naer
Iacob heeftse oock vercreghen
Sy en is ons niet versweghen
Maer gheworden openbaer.

Wy waren alle gheweken
Al van der salicheyt
Maer ons en mocht niet ghebreken
Al inder eewicheyt
Gods liefde daer veel aen leyt

[p. 146]

 

Doen wy noch vianden waren

 

So is Christus sonder sparen

 

Uoor ons ter doot bereyt.

 

 

 

Hier in prijst God zijn liefde

 

Teghen ons in deser tijt

 

Dat hy totter doot toe gheriefde

 

Sijnen sone ghebenedijt

 

Doen wy waren in Gods nijt

 

Is Christus voor ons ghestoruen

 

En heeft ons paeys verworuen

 

Uan sduyuels strick beurijt.

 

 

 

Wilt malcanderen bewijsen

 

So Christus gheboden heeft

 

Dat ghy die liefde laet rijsen

 

In als dat God aencleeft

 

Maer voor die liefde beeft

 

Die de werelt mach behaghen

 

Want in haer loose laghen

 

Heefter so veel ghesneeft.

 

 

 

Prince wildy veruullen

 

Gods wet goet en oprecht

 

En laet v niet verdullen

 

Want sy is al ghehecht

 

Inde liefde so ons secht

 

Alle Schriftueren oorconden

 

Sy verwint in allen stonden

 

Hoe seer mense beuecht.