Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Een ander. DEn geest is gewillich maer tvlees is cranc Dat mach ick my wel beclaghen Want ick heb alle mijn leuen lanc Na der werelt mijn ionste ghedraghen Ick en weet niet wat ick sal bestaen En ick vinde my vol ghebreken Ick heb haer so menighen dienst ghedaen Door haer wellustighe treken. Uander werelt en can ick my niet gesnijden Natuere en willes niet ghedooghen Uruecht en solaes doet my verblijden Daenschouwen van mijnen ooghen Het vleesch dat houdt my int bedwanck Om dat ick ben onghebonden Gheen vruecht en dunct my wesen te lanck Wellust trect my tot sonden. Die kennisse die ick hadde ontfaen Heb ick inder eerden ghegrauen Ghelijck de quade knecht heeft ghedaen En ben gheworden der sonden slauen Ick diende de werelt al om haer eer Dat wort my nv mispresen O Uader ick en ben niet weerdich meer Dat ick v sone sou wesen. Die werelt hebdy in v ghewelt Haer machten hebdy al benomen Met huer ben ick so seer ghequelt Uan haer en can ick niet ghecomen Sy is in my, en ick in haer Alleene hebdyse verwonnen [pagina 97] [p. 97] O Heere den strijt valt my te swaer Ick en hebs noyt begonnen. O Heere mijn gheest een wapen begheert Al om de werelt te bestrijden U Godlick woort tot een vierich sweert Scherp wesende aen allen zijden Een vast ghelooue tot eenen schilt So mocht ick strijtbaer wesen En haer verwinnen als ghy wilt So waer ick gansch ghenesen. Prince der Princen nv staet my by Dat ick victorie mach verweruen Dees dry vianden bestormen my Mijn siele willen sy bederuen De werelt en de duyuel ongheureest En mijn eyghen lichaem mede Sijn altijts rebel teghen den gheest Dus is mijn siele tonvrede. Die dit Lieken eerst heeft gheordineert Sijn herte dat light bedwonghen Sijn sinnekens zijn ghecorrumpeert Wt fantasien heeft hijt ghesonghen Die werelt en can hy niet wederstaen Bidt voor hem tallen tijden Dat hy rechte kennisse mach ontfaen Al sou hy daerom lijden. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij