Veelderhande gheestelicke liedekens

C Na de wijse. Uanden Mey.

DEn lustelicken Mey Christus playsant
Uol alder duechden groene
Is door den heylighen gheest als nv geplant
In alle gheloouighen coene
Die tot desen Meyboom schrijt

[p. 93]

 

Wort van alle sonden quijt

 

Sijn vruecht en al zijn leuen

 

Wilt hem Christus minnelick gheuen.

 

 

 

Het vriesen het sneeuwen is nv al ghedaen

 

Die winter en mach ons niet dwinghen

 

Die wet des ouden Testaments is al vergaen

 

Die liefde moet al volbringhen

 

Die vast aen Christus liefde cleeft

 

Ende lief zijnen broeder heeft

 

Als hem seluen na Paulus leeren

 

Hy volbrenghet die wet des Heeren.

 

 

 

De vogelkens singen op dat groene hout

 

So vrolick onbedwonghen

 

Dat zijn die Enghelkens menichfout

 

Ende alle gheloouighe tonghen

 

Dese singhen nv glorie fijn

 

Moet Christo in die hemelen zijn

 

Paeys mannen ende vrouwen

 

Die op zijn woort betrouwen.

 

 

 

Die Meyboom Christus so iuechdich bloeyt

 

Met duechden menigherhande

 

Hy heeft ons met zijnen dauwe bespoeyt

 

Sijn bloet tot eenen onderpande

 

Coemt alle die belast zijt ende slaeft ⁺

 

Tot my seyt hy, ghy wort ghelaeft

 

Ick sal v ontladen van sonden

 

Mijn iock is licht beuonden.

 

 

 

Sijn Godlick woort is een gebloeyet rijs

 

Daer wy op moeten beeten

 

Dwelck is beseghelt na Gods aduijs

 

Met Christus bloedich sweeten

 

Hy heeft den helschen viant groot

 

Die sonde ende die eewighe doot

 

Uerwonnen tot allen daghen

 

Ende al onsen last ghedraghen.

 

 

 

Coemt ter fonteynen die so oueruloedich staet

 

Wilt vanden water drincken

+ Mat.11

[p. 94]

 

Het welck tot in dat eewich leuen gaet

 

Christus wilt ons minnelick schincken

 

Want daer vloeyt wt Christus buyck

 

Leuende water tot onsen ghebruyck

 

Den heylighen gheest eersame

 

Schenct hy wt liefden tonser vrame.

 

 

 

Gheloeft sy die Meyboom victorieus

 

Die ons God schanck wt minnen

 

Wten gheslachte van Iuda coragieus

 

Een Leeu niet om verwinnen

 

Christus den eewighen Mey

 

Die maect alle herten bley

 

Met zijnen gheeste iuechdich

 

Die hem versoecken vruechdich.

 

 

 

O Prince Iesu Meyboom gebenedijt

 

So lustelick ontploken

 

Ontfanghet ons in v armkens wijt

 

Aent cruyce voor ons ontloken

 

Ghy zijt onsen troost en al ons vruecht

 

Alleenlick by uwer duecht

 

So worden wy deelachtich

 

In ws Uaders rijcke warachtich.