Veelderhande gheestelicke liedekens
(1558)–Anoniem Veelderhande gheestelicke liedekens–
AuteursrechtvrijC Na de wijse. Ey out grijsaert.
DIe Propheet is ons verhalich fijn
Door hem hebben wy verstant gecregen
Hy seyt, willen wy salich zijn
Totten boosen maect gheen weghen
Noch byden spotters zijt niet gheleghen
Onseker is haerlieder wet beraest
Die daer toeuerlaet op waent beteghen
Uoorwaer hy is verdwaest.
Al op die wet des Heeren acht
So sal v salicheyt multiplieren
Sijt daer met becommert dach ende nacht
Ghy ghelijct den boom aenden riuieren Ga naar margenoot+
Die vruchten brengt menighertieren
Een bladt en sal daer niet vergaen
Als dander verbrant zijn metten vieren
In vruechden suldy dan ghebloeyt staen.
Die sonder wet leeft onbedraeyt
| |
[pagina 92]
| |
God sal hem van zijn rijcke schuren
Licht als den wint tsant op waeyt
Den Godloosen hem sal gheburen
Sy sullen vergaen in corter vren
De ouertreders werden dan gheschent
Byden goeden connen sy niet gheduren
Want sy en hebben God niet ghekent.
O Israel weest nv verblijt
Ghy hebt eenen ghenadighen Heere
Slaet v handen tsamen maect iolijt
Tot Iacobs God een elck keere
En singt hem lof sonder cessere
En na zijn wet wtuercoren leeft
So en sal v God laten nemmermeere
Inder eewicheyt hy dat ghesworen heeft.
Och Israel dits mijn ghebot
Gheuet ghehoor, elck dat onthouwe
En achtet op gheen vreemde God
Noch en maeckt gheen beelden van siluer oft van gouwe
Aenbidtse niet, noch ick v ontuouwe
Wat dat Ieremias leert
Als ick mijn volck castijden souwe
Totten Afgoden zijn sy ghekeert.
Die waerheyt wilt voor eenen Prince ontfaen
Schriftuerlick can sy dit Liet betoghen
Den Sone is van zijnen Uader ghegaen
Maer dese Afgoden hebben ons bedroghen
Sy en sien noch en hooren al hebben sy ooghen
Leest Danielem arm ende rijck
Die dese beelden maken ende te aenbidden pooghen
Sy sullen te samen vergaen ghelijck.
|
|