Veelderhande gheestelicke liedekens(1558)–Anoniem Veelderhande gheestelicke liedekens– Auteursrechtvrij Vorige Volgende C Na de wijse. Mijn sinnekens zijn my ontoghen. DIe werelt heeft my bedroghen Des lijdt mijn herteken groote pijn En van die waerheyt ghetoghen Dies mach mijn siele wel droeuich zijn Mijn conscientie gaet my quellen Ick ben in grooten noot Want alle creatueren Gods vertellen Dat my slaet die wet ter doot. Ick mach wel suchten ende kermen Opt verbeyde van mijnen God Tot dat hy my eens wilt ontfermen Och die werelt heeft my bespot Dies wil ick mijn bedde nv wasschen Met tranen op elcken nacht Ende eten mijn broot in asschen Gods wet beneemt mijn cracht. [pagina 90] [p. 90] Ick wil ouerdencken alle mijn iaren In grooter bitterheyt Hoe ick hem heb laten varen Die my den hemel heeft bereyt Ick heb die creatueren voor hem vercoren Mijn hert ghetuycht teghen my Die Wet oordeelt my verloren Doot ende verdoemenis is by my. Ick ben ghecroont al totten ende Al mijn ghebeenten zijn ghestoort Helpt Heere in dese allende Eer dat mijn siele versmoort De wateren staen aen de kele Uwen thoorn is den swaersten last Mijn vianden zijn seer vele Och Heere helpt eer de doot my verrast. De doot is mijn gheselle Mijn bedde en vertroost my niet Mijn siele leyt inder helle Midts droomen crijcht mijn hert verdriet U pijlen hebben my doorsteken U weldaet mijn siele verschrict Laet v ghenade my niet ghebreken Eer dat mijn arme siele verstict. Mijn vrienden zijn my teghen Uander werelt word ick versmaet Mijn vianden hebben oorsaeck ghecreghen Sy veruolghen my met nijdighen haet Ick ben mijn ghebueren tot twiste Troost my mijn Heere mijn Godt De viant veruolcht my met liste Gheeft dat ick mach houden v ghebodt. Heere hoe muecht ghy my dus veruaren Ghy kent wat ghy my hebt ghemaect Wilt v belofte mijn siele verclaren Dat mijn gheest die gratie smaect Want sy zijn al af gheweken [pagina 91] [p. 91] Niemant en doeter goet Ghy kent Heer mijn ghebreken Ick valle v Heer te voet. Ick schrey met Magdaleene Met Petrus claech ick seere En metter Cananeescher vrou reene Bidde ick ghenade lieue Heere Metten Moordenaer aent cruys verheuen So bekenne ick mijn misdaet Och Heere wilt my mijn sonden vergheuen U verloren kint doch ontfaet. Gheeft my Heere die crachten Dat ick de sonden mach wederstaen So wil ick op v ghenade wachten Ende mijn cruys met blijschap ontfaen Als een nachtraue wil ick my houwen Eenich als een pellicaen En op v Heere alleene betrouwen Tot dat ghy myn siele sult ontfaen. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij