Veelderhande schrifturelijke leysenen ende gheestelijcke liedekens alle menschen tot devotie verweckende

[p. 36]

Een nieu Liedeken Vanden nieuwen Iaere.

DAt soete nieuwe Jaer, ende Jaer
Is ons nu inghecomen
Jae comen, ende iae comen
Ons Heer Godt laet ons
Ten besten en ten goeden vergaen.

Ende ick hope het sal
Ons allegader vromen
Ja vromen, ende ia vromen
Ick sie dat wout, ende ick sien dat wout
Soo schoon ghebloeyet staen.

Ende ick hoore den Nachtegale
Soo schoon ende vrolijck singhen,
Ja singhen, ende ia singhen
Al inden bosch, ende ia bosch
Staet soo na en vast hier by.

Ende een schoon Jonck vrouwe
Heeft mijn hert nu bevanghen,
Ja vanghen, ende iae vanghen,
Soo vaste ick en can haer, ende ick en can haer
Ontrijden noch niet ontgaen.

Ende soo wie, zijn lief
Spreeckt alle Jaersdaghen
Jae daghen, ende ia daghen
Met recht mach hy, ende met recht mach hy,
Wel vroolijck ende blijde soo mach hy zijn.

Dies mach ick my
Wel alsoo seer beclaghen
Ja beclaghen, ende ia beclaghen,
Ick en sach mijn lief, ick en sach mijn lief
Van allen desen iare niet.

Ende dese nijders tonghen
Moet Godt ende Maria verdoemen,
Ja verdoemen, ende ia verdoemen,
Sy wachten ons 't wee
Waer dat wy henen gaen.

[p. 37]

 

Ende wy hebben hier soo langhe ghestaen

 

Ja staen, ende jae staen,

 

Ick sien den lichten dagh

 

Al inden Oosten op gaen.