Veelderhande schrifturelijke leysenen ende gheestelijcke liedekens alle menschen tot devotie verweckende

[Het quamen dry Coninghen ghereden]

HEt quamen dry Coninghen ghereden
Wel verre uyt Orienten Landt,
Tot Bethleem de Stede,
Haers ghelijcke men noyt en vant.

Te Jerusalem soo wy hooren,
Al daer sy wilden zijn,
Sy vraechden waer is gheboren
Der Joden Coninck fijn.

Wy comen hem aenbeden,
Wy hebben zijn sterre ghesien,
Het is seer corts gheleden
Het moet wonder bedien.

Als Herodes dat verhoorde,
Wel seer ontsach hy hem,
Van binnen hy hem verstoorde.

[p. 20]

 

Ende alle Jerusalem.

 

 

 

Hy beval hen te gaene,

 

Hy sprack gaet soeckt dat kint,

 

Ick wilt oock beden aene

 

Comt seght my als ghy't vint.

 

 

 

Als sy buyten Jerusalem quamen

 

Op dien selven tijt,

 

Haer Sterre sy wederom vernamen

 

Dies waren sy seer verblijdt.

 

 

 

De Sterre was hen voorgaende,

 

Tot daer dat kindeken was,

 

Ende daer bleef sy staende

 

Sy buychden neder naert gras.

 

 

 

Een huyskens sonder doren

 

Dat vonden sy daer by

 

Ende dat kindeken gheboren,

 

Van Maria de maghet vry.

 

 

 

Sy vielen op der aerden

 

Voort kindeken jonck en niet oudt

 

Sy offerden hem met weerden

 

Wieroock, myrre ende goudt.

 

 

 

Snachts als sy slapen wouden,

 

Heeft hem Godts Enghel gheopenbaert

 

Eenen anderen wech dat sy trecken souden

 

Tot haren lande waert.

 

 

 

Nu loven wy alleene,

 

Dat kinderen weerdelijck

 

Dat hy ons wil verleenen

 

Hier nae zijn eeuwich Rijck. Amen.