Veelderhande schriftuerlijcke liedekens(ca. 1552-1554)–Anoniem Veelderhande schriftuerlijcke liedekens– Auteursrechtvrij Vorige Volgende 171. Een ander. O Dochter van Sion lief vercoren Fraey edel blinckende Diamant Schoon roose onder den doren Seer vruchtbaerlijck van my eerst geplant Siet nv hoe triumphant Al metter minnen brant Ic als bruygom uwer sielen hier Comt wt mijns Uaders lant Om v te doen bystant Want liefde is ons rechte banier Duer domloopen der stadt mijn chare En tsoecken met v wysheyt seer cleen En wort ghy my gheensins gheware Maer comt duer de wachters in gheween Dan in v ruste reen Ghelatentheyt certeen [Folio U6v] [fol. U6v] Uindt ghy my saen met trooste bereijt Want ick moet zijn alleen Die leyt den eersten steen Uan de stat v hoochste salicheyt. Hierom segt my mijn duyue schoone Waer ghy weydt oft rustende zijt Op dat ghy van my crijcht te loone Mijn trouwe onser sielen iolijt Want siet des winters tijt Des viants macht en nijt Is duer my alleen schier heel vergaen Den somer diet al vrijt Dats mijn ghenade wijt Is ghecomen en sal blijuen staen. Den vijgeboom heeft cnoppen ghecreghen Mijn gauen heb ick gestort seer soet Den wijnstock is bloeyende bedeghen Mijn woordt duer reijn leeringhe vroet U wort al tot goet Op dat heel v ghemoet En herte sou hanghen vast aen my En wy saen metter spoet Duer liefde diet al doet Mochten woonen te enghady. Compt laet ons de vossen vanghen Die hier teghen zijn dach ende nacht Die de wijnberghen duer loose ganghen Dick verderuen en benemen haer cracht Die boos slanghen gheslacht Met svleeschs vernuft beuracht Seer bedrieghelijk in haer voortstel Die altijt onbedacht Mijn woorden goet en sacht Oock veruolghen en zijn rebel. Princersse ghy schoonste der vrouwen Wiens siele mijn herte bemint Stelt alleen v hope en betrouwen [Folio U7r] [fol. U7r] Op my uwen alderliefsten vrint Dat zijn de borstkens kint Die van my zijn besint Aen v my lieflijck en aenghenaem Den Nardus ongheschint De Mirre reijn gheint Daer ick na hake met lust bequaem. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij