Veelderhande schriftuerlijcke liedekens

170. Na die wijse. Alle mijn ghepeys doet my soo wee.

OCh wee des anxst die mi omuangen heeft ⁺
Die weerelt doet mi so menich verdriet
Het vleesch dwelc altijt voor lijden beeft

+ Dan.xiij.

[fol. U5r]

 

Maect droefheyt ende claghe als hem druc geschiet

 

Och waer sal ick vlieden mijn cracht is niet

 

Die viant wil my heel vernielen

 

Dus wil ick singhen een droeffelijck liet

 

Tot den bruydegom mijnder sielen.

 

 

 

Och Heer wilt mijns ghenadich zijn ⁺

 

Want ick verheffe mijn siele tot dy ⁺

 

Als ick v aenroepe o schepper mijn ⁺

 

Och Heere soo en gaet doch niet verre van my

 

Ontwaecket Heere hoe langhe slaept ghy ⁺

 

Ontwaect en verstoot ons niet teenemale

 

O Heer der Heeren staet ons nv by

 

Op dat ons ghelooue niet en fale.

 

 

 

Gelijc slachschapen worden wy verworcht ⁺

 

Om uwent wille soo maectmen ons bloot

 

O Heere nv weest my doch een vaste borcht ⁺

 

Gheeft my nv stercheyt in deser noot

 

Wie sal ons scheyden van Gods liefde groot ⁺

 

Druck anxst oft tribulatie

 

Sweert vier noch water ia noch den doot

 

En mach ons scheyden door zijn gracie.

 

 

 

Die heer is met my ick en vreese niet ⁺

 

Uan alle dat my die mensche doet

 

Die Heere is met mi, om te helpen siet

 

Ick sal sien minen lust aen mijn vianden verwoet

 

Tis beter te betrouwen opden Heere goet

 

Dan hem op menschen te verlaten

 

Tis beter te hopen opden Heere soet⁺

 

Dan op die Princen hooch van staten.

 

 

 

Alle heydenen omuanghen my

 

Maer inden naem des Heeren wil icxse verslaen

 

Sy zijn mi al om ende om ghecomen by

 

Maer door den Heere sullen si worden verdaen

 

O Heere siet hoe si ons versmaen

 

Ghelijck die bien si my omringhen

 

Sy zijn geblust gelijc vier in doornen saen

 

Maer inden naem des Heeren wil icxse al tonder bringen.

 

 

+ Psal.v.

+ Ps.xxv.

+ Psalm.x[x]viiij.

+ Psalm.xliiij.

+ Psalm.xliiij.

+ Psalm.lxxi.

+ Ro.viij.

+ Psalm.c.xviij.

+ Psalm.c.xviij.

[fol. U5v]

 

Men stiet my dat ick soude vallende zijn ⁺

 

Maer die Heere hielp my door zijn machticheyt

 

Die Heere is alleen die stercte mijn

 

Mijnen lofsanck ende mijn salicheyt

 

Daer is een stemme van vrolicheyt

 

Int huys der oprechter soot is beschreuen

 

Die rechte hant der Heeren bewijst stercheyt

 

Die rechte hant des Heeren is hooch verheuen.

 

 

 

Heere wie is onder die Goden ws gelijcke ⁺

 

Wie is soo machtich in der heerlicheyt ⁺

 

U is de cracht ende dat rijcke

 

Uanden beghinne tot inder eewicheyt

 

Ghy hebt v volck in dijner bermherticheyt

 

Uerlost van Pharao tot onsen exempel

 

Ende hebtse in v stercheyt ⁺

 

Ghebrocht tot uwen heylighen tempel.

 

 

 

Ick en sal niet steruen maer leuen altijt

 

En vertellen dat werck des Heeren verheuen

 

Die Heere heeft my wel ghecastijt ⁺

 

Maer hy en heeft my die doot niet ouergegeuen

 

Al worden wy nv aldus verdreuen

 

Meynt niet dat God ons heeft verlaten

 

Christus seyt selue men vintet geschreuen

 

Om mijn woort sal v die werelt haten. ⁺

 

 

 

Doet my open die poorten der gerechticheyt

 

Dat ick daer mach ingaen den Heer aenbeden

 

Dat is die enghe poorte die totten leuen leyt ⁺

 

Cristus heeft selue daer door ghestreden ⁺

 

Eenen wech van weynich menschen betreden

 

Hy is seer enghe nau ende banghe ⁺

 

Op desen wech hebben so vele gheleden

 

Die Cristus na hebben gheganghen. ⁺

 

 

 

Den steen die den timmerlieden verworpen hiet

 

Is gheworden tot eenen hoecksteen ⁺

 

Dat seluen is vanden Heere gheschiet ⁺

 

Dwelck groot wonder voor onsen oogen scheen

 

Het is van Christo gheschreuen alleen

+ Psalm.c.xviij.

+ Exo.xv.

+ Matt.vi.

+ Exo.xv.

+ Psalm.c.xviij.

+ Matt.x.xxiiij.

+ Mat.vij.

+ Luc.xiij.

+ iiij.Esdr.vij.

+ Psalm.c.xviij.

+ Mat.xxi.

+ Mar.xij.

[fol. U6r]

 

Hy was ghesonden van sinen Uader ⁺

 

Tot in zijn eyghendom maer so achten hem cleen ⁺

 

Sy dooden hem als een misdader.

 

 

 

Nv prijst den Heere o Ierusalem ⁺

 

Die sinen gheest op v heeft wtghestort

 

Ghy liefhebbers Cristi nv volghet hem

 

Tredet hem na met dat sweert des geest omgort ⁺

 

O volck dat doer den Heere salich wort ⁺

 

Wilt nv vromelijcke strijden

 

Onsen druck es cleyne, ons lijden es cort

 

Uoor een soo grooten verblyden.

 

 

 

Desen dach heeft den Heere ghemaect

 

Laet ons verblyden en vrolijck daer in zijn ⁺

 

Heft op v hooft ende siet onse salicheyt naect

 

Laet ons nv vallen voor des Heeren aenschijn

 

O Here helpt o heere latet ghelucken fijn

 

Ghy zijt mijn God verhoort mijn bede

 

Och Heere ontfanct doch den gheeste mijn

 

In uwen eewighen vrede.

+ Luc.xx.

+ Ioan.i.

+ Psalm.c.xviij.

+ Eph.vi.

+ Deuter.xxxiij.

+ Psalm.c.xviij.