Veelderhande schriftuerlijcke liedekens


169. Na die wijse. Ick had een ghestadich minneken. O Heer al inder eewicheyt Hoe zijn wy dus verstoort Want al in uwer voorsienicheyt Uoorsten is cleyn en groot Uander gheboorten inder doot O Heer almachtich Uader Leert ons alle gader
[Folio U4v]
U belijen onsen noot. Wy zijn soo seer sorchuuldich Al in des weerels pleyn In lyden onuerduldich Want wy en weten niet certeyn O alder genadichste Heeren, van dat gelooue reyn Willet ons doch leeren Want ghy hebt die macht alleyn. Dat ghelooue is groot van machte Dat seg ick v voorwaer Het maeckt den Lammen crachtich Den blinden siende claer Het is Gods gaue voorwaer O Heere van alder weerden Leert ons doch volheerden Int ghelooue verre en naer. O ghelooue sonder mincken Heel recht sidy vermaert O Heere wilt ons ghedincken Int goede na uwen aert Ons int ghelooue bewaert O vader tot allen vren Ghedinckt v creatueren Al inder heneuaert. O ghy geuer van allen goeden Uan hemel en eerde een Heer Alleen sidy mijn hoede Mijns hertsen prijs en eer Aen v staet al gheheel O Christe mijne bede Is dat ghy ons gheeft vrede Doort ghelooue aen onsen Heer.