Veelderhande schriftuerlijcke liedekens

111. Na die wijse. Met eenen droeuen sanghe.

IN bitterheyt der sielen
Claghe ick dit iammer groot
Datmen dus siet vernielen
Die Gods woort belijden bloot
Ueel hebben themels broot ⁺
Betaelt met bloede root
Die Pharizeeuse sielen
Brenghense meest ter doot.

Een broeder goet van natueren
Heb ick na den gheest ghehadt
Die moeste den doot besueren
Te vueren binnen der stadt
Gods woort beleedt hy pladt
Daer hy gheuanghen sadt
Trijck Gods sal my ghebueren
Want hy belooft ons dat.

Hoe si my trecken en teesen
En quellen met verdriet
En wilt daerom niet vreesen ⁺
Die dat lichaem dooden siet ⁺
Mijn siele alsoo Godt riet
Daeraen en hebben si niet
Godt sal zijn aerme weesen
Troosten wat haer gheschiet.

Sijn vrouwe die hy beminde
Trooste hy met woorden soet
Sy was beuaen met kinde
Hy vreesde voor haer ontspoet
En sprack mijn vlees mijn bloet
En acht niet watmen my doet
En ghy Gods gheest versinde
Het waer met v al goet.

Aen al zijn broeders tsamen
Hy lieflijck oorlof nam

+ Ioan.vi.

+ Matt.x.

+ Luc.xij.

[fol. N7r]

 

Hy en wilde hem dwoort niet schamen

 

Als hy tscauot op clam

 

Als een onnoosel lam

 

Ootmoedich dat hy quam ⁺

 

Maer die woluen die daer quamen

 

Die bleuen al euen gram.

 

 

 

Met seuen wreede slaghen

 

Heeft hy die doot ontfaen

 

Noch moestmen het hooft af saghen

 

Eer die martelerie was ghedaen

 

Alle die dit saghen aen

 

Die worden al eenen traen

 

Hoe condy Godt verdraghen

 

Die uwen gheest dus wederstaen.

 

 

 

Sijn aerme beuruchte vrouwe

 

Die maecte groot misbaer

 

Sy sterf van grooten rouwe

 

En oock de vrucht met haer

 

Dit bitter lyden swaer

 

Mochtmen aenschouwen daer

 

O Godt ghy zijt ghetrouwe

 

Ghy wreecket wel hier naer. ⁺

 

 

 

Och broeders wtuercoren

 

Dit doet tserpents fenijn

 

Sydi van Godt gheboren

 

En vreest gheen sulcx ghepijn ⁺

 

Al toocht dat helsche swijn

 

Op ons een toornich schijn

 

Dwoort Gods moet al voren

 

Met bloede beseghelt zijn.

 

 

 

Al worden wy mispresen

 

Ueruolcht int eertsche dal

 

En moeten een gaepspel wesen

 

Ter weerelt groot en smal ⁺

 

Als schaepkens wt den stal

 

Uerstroyt zijn ouer al

 

Godt die sal ons wel ghenesen

+ Mat.vij.

+ Hebr.[xi].

+ Matt.[..].

+ i.[Cor.iij.]

[fol. N7v]

 

Alst hem belieuen sal.

 

 

 

Broeders diet woort betuyghen

 

Den vrede en tnieuwe ghebot

 

En wilt gheen knien buyghen

 

Uoor Baal den afgodt

 

Al zijn wy des weerelts spot

 

Gheheeten dwaes en sot ⁺

 

Wilt troost in twoort Gods suyghen

 

Dat bidt ick v int slodt.

+ i.Cor.iiij.