Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij110. Na die wijse. Het saeten dry Lansknechten al inden coelen wijn.IEsabels
priesters zijn opgestaen
Ga naar margenoot+
Met die valsche propheten hoort dit vermaen
Sy bringhen tvolck in dolen
Si leerense tot houten tot steenen
beelden gaen
Gods eere worter duer ghestolen
Ten blijft niet verholen.
| |
[Folio N5v]
| |
Sy segghen dat si Gods stehouders zijn
Sy bringhen donnosele in swaer ghepijn
Uan die Gods woort vermonden
Sy vergheuen om ghelt duer eenen heyleghen schijn
Den menschen haerlieder sonden
Tsijn valsche vonden.
Wort yemant oock met siecten ghequelt
Sy segghen gaet beuaert offert daer v ghelt
Brengt eyeren, vleesch, boter, en coren
Een wassen keersse die moet daer zijn ghestelt
Och vrinden tis al verloren
Alsulck oorboren.
Dan stichten si eenen ommeganck
Sy bringhen volck in sulcken bedwanck
Wildy in dees gulde comen
Soo suldy zijn beurijt met v huys v leuen lanck
Duer tghebedt van deser heyligher bloemen
Schoudt sulck verdoemen.
Dies moet ghy brengen oft senden alle iaer
U offerhande op desen outaer
Tot onderstant van desen dienst en lichte
Die wy hier celebreren voor elcken openbaer
Gheeft penninghen goet van ghewichte
Tis een quaet ghestichte.
Den offer vander beuaert tot alder stont
Ualt Iesabels Priesters inden mont
Alsoomen mach aenschouwen
Niet tot profijt der ermen, siet desen loosen vont
Maer si geuent den lichten vrouwen
Al diese houwen.
Hoe souden de sulcke Gods stehouders zijn
Die niet en onderhouden Gods gheboden fijn
Die giericheyt en dronckenschap hanthieren
Hoereerders, afgoden dienaers rekent Godt fenijn
Gheslachte der slanghen gieren
En boose dieren.
| |
[Folio N6r]
| |
Die daer dienen en wandelen byden outaer
Die moeten daer bi leuen dit segghen si voorwaer
Het staet oock soo gheschreuen
Der menschen gheboden leeren si eenpaer
Gods woort worter duer verdreuen
En wt ghewreuen
Den outaer daer ons scriftuer af seyt
Is Christus den steen seer hooghe gheleyt
Die vanden wercklieden was verdreuen
Hy is den rechten wech en oock de salicheyt
De waerheyt en dat leuen
Is ons ghegheuen.
Die by desen outaer wel leuen wilt
Doe aen tgelooue tot eenen schermschilt
Ter salicheyt wilt v begheuen
Aenueert Gods woort van donghelooue stilt
Soo suldy biden outaer leuen
Soot staet gheschreuen.
Paulus die heeft by nachte ghewrocht
Duer dwerck zijnder handen heeft hy den cost
gecocht
Inden dach ghinck hy preken en leeren
Die niet en werckt en sal niet eten ten helpt niet ondersocht
Al draghen si langhe cleeren
Tis dwoort des Heeren.
Och vrienden betrout op Christus woort
En wandelt in zijnder liefden voort
Wilt v van alle boosheyt keeren
Tis te vergheefs dat ghi afgods dienst oorboort
Tis teghen tgebot des Heeren
Schout sulcken leeren.
Den val van Babilon sal comen schier
De beeste wert ghegrepen duer Gods bestier
Met alle haer valsche Propheten
En al diese dienen salmen worpen in dat vier
Inden poel van feninicher beten
Met haer vermeten.
|
|