Veelderhande schriftuerlijcke liedekens

106. Een ander.

HOort altesamen int ghemeene
Ionck en out, arm en rijck
Die in benautheyt en in weene
Ligt gheuallen vanden dijck
Wilt niet verslaghen//laet staen v claghen
Ghy sult noch rijsen alle ghelijcke.

Al is beroyt den ambachts man
En den huysbuyck int verdriet
Der fortuynen rat wel draeyen can
Wilt daer om verslaghen niet
Wt onsen ghetruere//in corter huere
Sullen wy noch comen siet.

Pouer die is wt ghelaten
Gheluyt der armoeden verre men hoort
Uerdriet en benautheyt in allen straten
Maken tvolck alomme verstoort
Maer wilt niet wanhopen//Gods gratie staet open
Bidt den Heere al om confoort.

Den arbeyt die claecht nv seere
Ouer het ghelt zijn liefste soet
Maer int ghebruycken tzijnder oneere
Onnuttelijck hijt verdoet
Ons eyghen sonden//zijn die ons wonden
Die te rechte wel beuroet.

Ghewelt ende hoouerdie
Brootdroncken weelde zijn bekent
Ouerdaet aen elcke sie
Regieren den tijt present

[fol. N2r]

 

Dies men hoort suchten//in alle ghehuchten

 

Ouer des wreeden tijts torment.

 

 

 

Practijcke ende woecker tsamen

 

Domineren niet dat ghelt

 

Al sout Arbeyt bat betamen

 

Sy houwense al met ghewelt

 

Hy moet ghedooghen//met weenenden ooghen

 

Duer den tijt wort hy ghequelt.

 

 

 

Den toecomenden tijt met druck en pijne

 

Dreycht ons met benautheyt fel

 

Onder quaetheyts discipline

 

Dies wy mueghen suchten wel

 

Die leste Iaren//hem openbaren

 

En wilt niet gheloouen el.

 

 

 

Prinche alle minste en meeste

 

Nemet in dancke wie ghy zijt

 

Uan ons liefhebbers ionck van gheeste

 

Laet toch varen alle verwijt

 

Wilt schouwen queste//wy doen ons beste

 

Ons factie is na den tijt.