Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio M8v]
| |
HOort hoe Christus na Galileen
Track wt dat Iootsche lant
Om dat hem die Phariseen
Benijden in elcken cant
Door
Samarien moest hy wesen
Ga naar margenoot+
Daer hi by een fonteyne quam
Die Iacob also wy lesen
Gaf Iosep sinen soon ghepresen
Daer Iesus zijn ruste nam.
Sijn discipulen ghetrouwe
Ghinghen spijse coopen al tot Sichaer
Een Samaritaensche vrouwe
Quam om water te putten daer
Want Iesus bleef daer alleene
Ende hy sprack dat vrouken toe
Gheeft my wt ionsten reene
Een droncxken waters cleene
Want hy was van gaen soo moe.
Hoe begheert ghy van mi dus Heere
Te drincken sprack tvrouken gent
Want die Ioden in gheenen keere
Samaritanen comen ontrent
O vrouken sprack Christus verheuen
Kende ghy Gods ghiften soet
Ghy soudt hem om drincken aencleuen
Ende hy soude v water gheuen
Dwelck eewelijck leuen doet.
Wat water mach dit wesen
Sprack het vrouken goedertier
Sijt ghy bouen Iacob ghepresen
Want hy haelde zijn water hier
Christus sprack hem sal noch dorsten
Die van dit water drinct
Maer in wien mijn water mach rusten
Hem en sal nemmermeer drincken lusten
Twelck int eewich leuen sprinct.
Wilt mi van dat water schencken
| |
[Folio N1r]
| |
Sprack tvrouken tot Christum dan
Christus sprack wilt v bedencken
Ende roept mi uwen man
Tvrouken sprack na Iohannes bescriuen
Gheenen man en heb ick soo ghy siet
Christus sprack om duecht te verstiuen
Hy hebter ghehadt tot vijuen
Ende die ghy nv hebt en is v niet.
Heere ghy zijt een Prophete
Sprack tvrouken hoort dit vermaen
Ghy segt my wat ick int secrete
Binnen minen leuen hebbe misdaen
Waer moetmen God aenbeden
Op den berch te Ierusalem fijn
Segt mi Heere vol wijsheden
Want hier die Ioden vol onureden
Om die Samaritanen zijn.
Ghy en weet niet sprack die Heere
Wien ghy aenbidt oft vreest
Soo wie Godt bidden wil tot zijnder eere
Moet hem bidden inden gheest
Doen sprack die vrouwe vol vramen
Ick ghelooue dat ghy Messias zijt
Met dien zijn discipulen quamen
Meester seyden si altesamen
Mer Christus hadde anderen appetijt.
Het vrouken is sonder sparen
Ras na die stadt Sichar ghegaen
Sy liepen al om te openbaren
Ende haer cruycke liet si staen
Wat haer gheschiet was ghinck si ontknoopen
Als tvolck dit hadde gehoort
Het quam met grooten hoopen
Neerstich wt die stede gheloopen
En gheloofden aen Christus woort.
Ghy christene in alle hoecken
Betrout aen Christus woorden naect
| |
[Folio N1v]
| |
Wilt in hem v salicheyt soecken
Dats die spijse daer hy na haect
Den oogst is nv voor ooghen de vruchten staen al
widt
Wilt Christo liefde toghen
En uwen naesten te helpen poghen
Soo dat ghy zijn eewich rijck besidt.
|
|