Veelderhande schriftuerlijcke liedekens


104. Na die wijse. Ick weet een vrouken amoreus. HOort Cristus vermaen met woorden soet Tot sinen Apostelen wtuercoren Preket woort Gods siet wat ghy doet Mijn schapen loopen al verloren Sijt simpel als een duyue int hooren Schalck als serpent Wacht v ontrent Aensiet den wolf al van te voren. Nero en was noyt soo wreet Als nv die weerelt ick moet vermonden Soo wie dwoort Gods trechte wt weet Wert van die wolf verslonden Sy rasen als verwoede honden Soo wy nv der tijt
[Folio M8r]
Die waerheyt belijt Wert met Manassum gheuonden. Het licht des Euangelie claer Wert nv ter weerelt onsteken Men sietet verdryuen tzy oft daer Dit zijn des weerelts ghebreken Schaep wert van den wolf versteken Ick hope men sal Noch ouer al Die waerheyt hooren preken. Sy comen ten tempel om haerlieden profijt Ghecleet met schaepts cleeren Tsijn grypende woluen vol haet en nijt Dat zijn die weerelsche Heeren Gods tempelen sietmen onteeren Den inne ganck Wort een wissel banck Wee v ghy Schrijuen en Phariseen. Soo wie een pont ontfanghen heeft Uan gheestelijcke gauen Siet dat hijs twee wederom gheeft En wilt pont niet grauen Helpt Christum met den cruyce slauen Al acht men v saen Een Publicaen Laet sulcke woluen drauen. Princelijcke broeders doet Paulus raet Uerblijt v met den blyden Bemint die duecht en laet het quaet Met den droeuen hebt medelijden Helpt Christum vrolijck stryden Doet onderstant Des uwen vyant Beminse die v beniden.