Veelderhande schriftuerlijcke liedekens


103. Een ander. Hoort ghy alle in desen tijt Ghy mannen ende vrouwen Laet ons gaen met groot iolijt Handen en de knien vouwen Ghelijckelijck tot Godt//ende houwen zijn gebot Soo worden wy nieu herboren Al inden gheest//die niet en vreest Want Christus heeft ons wtuercoren. Schamen moghen wy ons wel Die hier in sonden slapen Ende zijn Godt dus rebel Die ons heeft gheschapen Ende dienen God bel//die ons brengt int gequel Gods woort gaen wy versmooren Och soect toch baet//eert valt te laet Want Christus heeft ons wtuercoren. Laet ons suchten voor ons misdaet Wilt Godt v herte schincken Keert dan met berou van quaet Gheen sonden en wil Godt ghedincken
[Folio M7v]
Is dat met soet accoort//dat Godt spreect sulck woort Het is siet al te voren Compt spreect hi sone excellent//hi is onsen loon present Want Christus heeft ons wtuercoren. Al ons leuen is eenen strijt Spreeckt Iob op deser eerden Wy en hebben gheen respijt Die doot compt ons aenueerden Dan compt dat oordeel snel//dat bringt ons in de hel Dan ist toch al verloren Och soect toch baet//eert wort te laet Want Christus heeft ons wtuercoren. Prinche maect v van herten reijn En wilt toch leuen na den gheest Hout in eeren Gods woort alleijn Soo langhe ghy zijt in dit foreest Selt v hope alleen op Godt//hebt lief die met v spot Wilt alle ghenuechte verstooren Doetmen v aen last//staet vry vast Want Christus heeft ons wtuercoren.