Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio M4v]
| |
HOe deerlijc roep den geest op god aluoren
O God aensiet mijn swaer torment
Want ick gae heel verloren
Tvleesch is altijts teghen my ghewent
Wee my allendich mensche verblent
Dat ick noyt was gheboren.
Als tvleesch den geest dus hoorde claghen en
suchten
Het sprac schaft eenen hupschen moet
Waer vooren wilt ghy duchten
Ick hebbe wel ghelt en daer toe ghoet
Ick ben moy edel sterck ende vroet
Dus moet elck voor my vluchten.
Doen sprack den gheest o vleesch cesseert van
desen
Wy hem verheft wert vernedert snel
Soo wy in Lucas
lesen
Ga naar margenoot+
Spieghelt aen Lucifer fel
Die om een houeerdich ghepeins rebel
Eewelijck verdoemt moet wesen.
Tvleesch sprack ic moet nochtans mi seluen prijsen
Want die hem seluen gheen eere en ian
Wie sal hem eere bewijsen
Die niet vreck en is tsi wijf of man
Ende zijn eyghen profijt niet soecken en can
Mach nv ter weerelt niet rijsen.
Doen sprac den gheest merckt aen Iesus vol
genaden
Die hem ootmoedelijc dooden liet
En cruycen metten quaden
Hy en leedt dit voor hem seluen niet
In hem en was gheen sonde
Maer dit verdriet leedt hy voor ons misdaden.
Doen sprac dat vleesch men mach hem niet
vermeten
By Christu wi zijn al menschen cranck
Dus prijs ick drincken ende eten
Ende vroyelijck sitten op die bierbanck
En rusten in mijns liefs armkens blanck
En alle druck vergheten.
Doen sprac den geest peynst doch dat ghy moet
steruen
| |
[Folio M5r]
| |
Alle vleesch is hoey secht den Propheet
Wy en hebben hier gheen eruen
Ende die hier een oncuysch leuen leedt
Of in dronckenschap soo Paulus verbreet
Hy moet Gods
rijcke deruen.
Ga naar margenoot+
Doen sprac dat vleesch wi zijn noch ionck
van dagen
Wi suller om dincken waren wi oudt
En sien God te behaghen
Dus laet ons nv met moede stout
Dansen houeren menichfout
Ende alle druck veriaghen.
Doen sprack den geest o vleesch vol van doluere
Wy en hebben dit leuen niet verpacht
Dus waect secht Christus puere
Want hy sal comen onuerwacht
Ghelijck een dief compt inder nacht
Wy en weten dach noch huere.
Doen sprac dat vleesch ic wilde so wel leuen
Soo ghy my raet int openbaer
Soo mocht ick zijn verheuen
In dese weerelt verre ende naer
Ick wilde wel duechdelijck heeten maer
Ick en canner my niet toe gheuen.
Doen sprac den geest die sweerelts eere soecken
Sy hebben hueren loon ontfaen
Oorcondts Mattheus boecken
Dus wilt alleene voor Christum staen
Uerdraecht en bemint die v versmaen
Om Christum tallen hoecken
Prinche verwint v vleesch dus tallen tijden
Met Christus woort dat geestelijck sweert
Twelck snijt aen beede siden
Die hem hier mede vromelijck weert
Noch viandt noch sonde noch doot hem deert
Noch al die hem benijden.
|