Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio M5v]
| |
HEt leuen duert eewelijcke
Uoor die goede tot alder tijt
Gheen leuen desen ghelijcke
Dus schept doch nu iolijt
Wie dat ghy oock zijt
Alsoo vele als wy mueghen
Hy maeckt ons die sonden quijt
Alleen dies nv verblijt
Dus laetter ons inne verhueghen.
Gods woort certeijn nv crachtich
Nv inde weerelt regneert
Christus die is alleen warachtich
Die op ons herte noteert
Hi niet en dispeteert
Die doot heeft hy verslonden
In hem niet en muermereert
Maer op zijn woort glooseert
Hem looft tot allen stonden.
Hy is alleen ons leuen
Dus wilt hem segghen danck
Die sonden heeft hy verdreuen
Die ons hiel int bedwanck
Des helschen viant stranck
Maer om ons weer wt te halen
Hy ons sinen sone wt liefden schanck
Want wy waren alte cranck
Dus quam hijt selue betalen.
Cristus die en can niet lieghen
Dus volghet die schriftuere iendt
Ten sal v toch niet bedrieghen
Dus legter inne v fondament
Al sidy in sonden verblent
Wilt v in tijts bekeeren
Denct hy is al sonder endt
Dus betroudt hem exellent
Christum den Heere der Heeren.
Wilt v alleen in zijn woort spijsen
| |
[Folio M6r]
| |
En wt der weerelt gaen
Soo sult ghy in hem verrysen
Dus sou ick v hier raen
Wilt hant aent cruyce slaen
En wilt hier lijden wt minnen
Altijt van dwoort vermaen
Blijft daer toch vast op staen
Dit is des leuens beghinnen.
Die helle heeft hy verwonnen
Al duer sijn lyden swaer
Dat heeft hy dus begonnen
Om dat wy sonder vaer
Hem souden soo volghen naer
En van die weerelt hier steruen
Door tvleesschelijck lyden voorwaer
By Godt den Uader int leuen claer
Soo suldy vruechde verweruen.
Cleyn groot, tsi ionck oft out
Al van die weerelt hier toch vliet
Inden Heere alleen betrout
Singt hem een vrolijck liet
Uan die weerelt was gheschiet
En wilt steruen alle ghemeene
Sijn woort altijt bediet
En segt wy zijn al niet
Maer Christus is al ons leuen reene.
|
|