Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio M3v]
| |
HOort toe met vierigher herten veruult
Ghy Christen broeders vercoren
Wat dinghen ghy gheloouen sult
Die geerne twoort Gods orboren
Wy sullen al sonder flouwen
Ons ooghen inden hemel slaen
Ende in ons eyghen consciencie gaen
Op God stellen ons betrouwen.
O Christen broeders alle gader
Eerst soo moeten wy al ghelijck
Ghelouen in Christum onsen vader
Schepper van hemelrijck ende aertrijck
In Ihesum Christum verheuen
Noch moet ghy gheloouen alder meest
Dat hy ontfanghen is vanden heylighen gheest
Daer wy altesamen by leuen.
Iesus ons alder schepper goet
Die hadde wtuercoren
Maria die suyuer maghet soet
Daer hy af wilde zijn gheboren
Want si is reyn ende puere
Ghelijck die bloem was si fijn
Daer Christus af wilde gheboren zijn
Twelck ons bewijst die schriftuere.
Die menschelijcke natuer heeft hi aen
genomen
Christus die Heere ghebenedijt
Ende heeft ghegaen tot onser vromen
Uoor ons in eenen bitteren strijt
Ghepinicht ghepassijt alle zijn leden
Onder Pontio Pylato al met spot
Dus laet ons aenbidden eenen Godt
Die voor ons heeft ghestreden.
Het rijck zijns vaders heeft hy ons verworuen
Om smenschelijc geslacht te salueren
Is hy ghecruyst ende ghestoruen
Begrauen wilt dit informeren
Want niemant groot oft cleene
| |
[Folio M4r]
| |
En mach ons helpen wter noot
Doen wy laghen doot
Dan Christus die Heer alleene.
Met zijnder godlijcker cracht
Heeft hy tvyants banden doen vellen
Om te verlossen dat menschelijcke gheslacht
Is hy neder ghedaelt ter hellen
Die daer laghen in swaer ellenden
Sy riepen ghemeenlijck o God o
Benedicamus domino
Want si den Heere bekenden.
Daer na is Cristus die Heer warachtich
Ten hemel gheuaren met zijn godlijcheyt
Ter rechterhant zijn vaders almachtich
Daer hy ons heeft allen dach gheleyt
En comen wi in hem betrouwen
En ons leuen afgaen
Nyemant en sal buyten staen
Maer dat eewighe rijck beschouwen.
Laet ons Christum aenbidden al
Die is ons meest van nooden
Want hy comen gheuen sal
Oordeel ouer leuen ende dooden
En wilt dit ghelooue niet begheuen
Mer wilt dit ouerdachtich zijn
Want Gods woorden warachtich zijn
Daer wy alle by moeten leuen.
Ureest uwen Godt dit is tslot
Die Princen al inden throone
Hout zijn ghebot schout tviants lot
O Christen broeders ydoone
En wilt v niet laten verleyden
Want Christus spreect in dit beuanck
Ick ben die dore ende die inganck
Wilt v tot hem bereyden.
|
|