Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio M2v]
| |
HOort toe ghy kersten samen
En wilt niet zijn beswaert
Alle die Gods woort beminnen
Hoe
ons Iohannes verclaert
Ga naar margenoot+
Int achste capittel beschreuen
Hoe Iesus smorghens vroech
Ghecommen is inden tempel
Leerende tvolck menich goet exempel
Die Phariseen haddens spijt ghenoech.
Die Phariseen quaet van ghedachten
Uoor Iesus op dat pas
Een vrouken dat si brachten
Die in ouerspel beuonden was
Sy seyden meester dese vrou is beuonden
In ouerspel met boosen gheschal
Dus wilt hier vonnisse ouergheuen
In Moyses wet daer staet gheschreuen
Datmen dusdanighe steenen sal.
Om Iesus tachterhalen
Hebben si desen list gheleyt
Want hy met soeter talen
Altoos sprack van barmherticheyt
Om Iesum tonder soecken
Of hy zoude hebben gheseyt
Datmense soude steenen
Dit was haerlieder meenen
Dat en ware gheen barmherticheyt.
Christus de Heere vol weerden
Die boogh hem neder saen
Ende schreef inder eerden
Wat si selue hadden misdaen
Sy saghen daer int ronde
Op malcanderen al ghemeen
Hoort wat hem Christus oorconde
Die van v is sonder sonde
Die werpe den eersten steen.
Hier by moghen wy bedieden
| |
[Folio M3r]
| |
Dat een eyghelijck wel verstaet
Sijn houeken suyuer sal wieden
Eer hy in eens anders gaet
En wilt gheen vonnisse gheuen
Daer ghy selue in beschuldich zijt
Want si saghen daer gheschreuen
Haer misdaet die si hadden bedreuen
Twelck ons Deuangelije belijt.
Die Phariseen ghemeene
Sijn al tsamen wech ghegaen
En lieten daer alleene
Het vrouken voor Christus staen
Christus al sonder sparen
Die vraechde tvrouken saen
Waer dat si waren gheuaren
Al die haer quamen beswaren
Ende haer beschuldicht haen.
Heeft v yemant verdomt van desen
Heeft Christus dat vrouken gheuraecht
Och niemant Heere ghepresen
Sprack dat vrouken seere versaecht
Soo en wille ick v niet verdommen
Sprack tot haer Christus die Heer
En dient gheen vremde afgoden
Gaet leeft naer mijn gheboden
En sondicht voortaen niet meer.
Die barmherticheyt ons Heeren
Moghen wy hier by verstaen
Elck die hem wil bekeeren
Al is hy met sonden belaen
Wilt hy voort duechdelijcke leuen
Hy wert met Christus beurijt
Maer en wilt gehen oordeel gheuen
Daer een ander om soude sneuen
Op dat ghy oock niet gheoordeelt en zijt.
|
|