Veelderhande schriftuerlijcke liedekens(ca. 1552-1554)–Anoniem Veelderhande schriftuerlijcke liedekens– Auteursrechtvrij Vorige Volgende [Folio M1v] [fol. M1v] 97. Een ander. HOort al tsamen die met Cristum wil leuen Hoe dat Christus ghebenedijt Om ons te verlossen so der staet gescreuen Is ghegaen in eenen bitteren strijdt Alsoo ons de schriftuere belijdt Iudas waren xxx. penninghen ghegheuen Dat hy Iesum zoude leueren des seker zijt. De discipelen seyden tot Cristo laet ons weten Waer dat ghy wilt dat wy zullen gaen Het Paeslam bereyden op dat ghijt moecht eten Om dat altesamen soude zijn voldaen Twee discipelen hoort mijn vermaen Ghinghen inde stat dat Paeslam bereyden Alsoo si van Christo hadden verstaen. Tsauonts als si waren aen die tafel geseten Soo dede Christus daer een vermaen Uoorwaer segh ick v ende laet v weten Een van v allen sal my verraen Een yeghelijck was met druck beuaen Elck seyde ben ickt Heere latet ons weten Ende waren seere daer in belaen Iesus antwoorde wilt my hooren spreken Hy is hier mede int ghetal Die met mi zijn hant inde schotel sal steken Die ist die mi verraden sal Ghelijck van hem geschreuen is een voor al Maer wes hem die comt in sulck ghebreken Die de zone des menschen leueren sal. Ben ict niet meester heeft Iudas gesproken Christus sprack ghy hebtet gheseyt Iesus nam dat broot en heuet ghebroken Dat hy zijn discipelen bereyt Neempt eet dit is mijn lichaem voor v ghespreyt Ende hy nam den kelck d[a]nckennde schoonn ontloken Da[t] nieuwen testament in mijn bloede bereyt. [Folio M2r] [fol. M2r] Christus ghinc na de berch van Oliueten Om dat altesamen soude zijn volbracht Hy sprack tot zijn apostelen int secreten Ghy sult mi al versaken in dese nacht Peeter sprack een woort seer groot Al waert dat si v altemael verlieten Soo sal ick bi v bliuen tot in mijn doot. Iesus sprac voorwaer wilt dit wel smaken Ten is niet in dijn eyghen cracht Uoorwaer seg ick v ghi sult mi noch versaken Eer den haen craeyt, driemael in deser nacht Sijn discipelen heeft hy met hem ghebracht Segghende wilt nv een weynich met mi waken De huere compt daer ick naer hebbe ghewacht. Inden berch van Oliueten is Cristus getreden Uan anxste sweete water en bloet Daer heeft hy zijnen hemelschen vader aengebeden Ghestrect op deerde met grooter ootmoet Abba mijn hemelsche Uader goet Uan my neempt desen kelck van bitterheden Maer vader uwen wille hier met my doet. Dit was de huere die Cristus soude naken Sijn apostelen die hy slapende vant Muecht ghy niet een huere met my waken De gheest is ghewillich maer tvleesch is cranck Slaept ende rust nv vrij en vranck Het is ghenoech de huer is ghecommen Dat ick sal gheleuert worden eer yet lanck Aldus is Cristus inden strijt gecommen De persse heeft hy alleen ghetreden ende heeft al de weerelt sonden op hem genomen Ende sinen Uader gestelt te vreden Duer zijn bitter doot die hy heeft gheleden Laet ons op hem betrouwen het sal ons vromen En betooghen dat wi zijn een van Cristus leden. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij