Veelderhande schriftuerlijcke liedekens

84. Na die wijse. Rijck Godt wie sal ickt claghen.

HOort menschen al vol zonden
Uerhuecht in uwen gheest
Uwen Medecijn is vonden
En zijt niet meer beureest
Wy in schriftueren lesen
Die doot heeft hy ontfaen
Ia dat meer is oock verresen
Aldus voor ons al voldaen.

Wat is daer meer te doene
Om te weeren ons sondich ghepijn
Maer duer Christus liefde groene
Soo moet elck werckende zijn
Hoort wijse en wel ghesinde
Hy storte voor ons zijn bloet
Ghelijck hi ons beminde
Hem diesghelijcx oock doet.

Die Liefde na Paulus leeren
Weert wel ons sondich verdriet
Sy veruult die wet des Heeren
Sy en soect haer seluen niet
Hy en is niet ledich beuonden
Soo wie Gods liefde draecht
Maer hy werckt tot allen stonden
Een werck dwelck Gode behaecht.

Die liefde is sonder blamen
Wel hem die Gods liefde oorboort
Wet ende ghebodt te samen

[fol. K8r]

 

Begrepen zijn in dit woort

 

Ghelijck ghy wilt datmen v dede

 

Oock desghelijcken doet

 

Christus dit woort voorsede

 

Tot zijnen Discipulen goet.

 

 

 

Volcht Christum in zijn raden

 

Wilt hooren na zijn vermaen

 

Al die beswaert zijn en beladen

 

Compt tot my ick sal v ontfaen ⁺

 

Hi is den wech en dleuen

 

Gaet tot hem sonder ducht

 

Hi wil die sonden al vergheuen

 

Uan hem die hertelijck versucht.

 

 

 

Een leuende Fonteyne

 

Is hy, wilt tot hem vlien

 

Duer zijnen naem alleyne

 

Moeten buyghen alle knien

 

Gheenen anderen naem op deerde

 

En mach ons maken goet

 

Alle lof, prijs, eere, en weerde

 

Elck mensche hem gheuen moet.

 

 

 

Princelijck Godt niet falich

 

Wel hem wiens sonden berout

 

Ghy maect alleene salich

 

Elck die in v betrout

 

Soo wie hier is ghehuldich

 

Tot sinen naesten beleeft

 

Al zijn wy Heere v schuldich

 

Om niet dat ghijt vergheeft.

+ Mat.xi.