Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij67. Een ander.GHenade roep ick Heere Godt
Ghenade ende ontfermherticheyt
My druckt soo seere v heylich ghebot
U wet die ons totter gherechticheyt leyt
Sy wil dat ick int nau int breijt
Uan haer een woort niet en soude gaen
Hier omme ist dat mijn herteken screyt
Uan grooten druck moet ick vergaen.
Ick weet si is heylich ende goet
Tot mijnen grooten voordeel ghemaeckt
Soo dat ickse behoef tot alder spoet
Te minnen en te volghen naect
Nochtans ist mi alsoo misraect
Dat ickse verachte, en laetse staen
Ia dat ickse hate wat batet versaect
Uan grooten druck moet ick vergaen.
Si wijst dat ick met herten alleen
Mijn trouwe gansselijck op v set
Op v mijn Uader en anders gheen
Ende ghy sult mi helpen wat mi let
Dit en can ick alsoo net
Ghedoen hoe ick hier om ben begaen
Crijch ick hier van v gheen ontset
Uan grooten druck moet ick vergaen.
| |
[Folio I2v]
| |
Sy wil dat ick minen euen mensche
Lief heb soe ick my seluen min
Dat ick hem en doe oft niet en wensche
Noch yet begrijp in mijnen sin
Daer van hy hadde druck oft onghewin
Wt quaden wille by my ghedaen
Hier in weet ick eynde noch beghin
Uan grooten druck moet ick vergaen.
En niet alleen dat ick alle quaet
Hem laet doen oft eenich verdriet
Maer dat ick hebbe naer mijnen staet
In sinen noode en weyghere niet
Te gheuen of te leenen oft anders yet
Hem te troosten oft in staden te staen
Dits Heere dat ghy soo hert ghebiet
Uan grooten druck moet ick vergaen.
Wilt daer om Uader v arm kint
Aensien zijn groote katijuicheyt
Hoe eyghen liefde my maeckt soo blint
Soe vast in sduyuels stricke gheleyt
Die my Heere soo verre van v spreijt
Soe vremt tot minen broederen doet gaen
Al en waer my noyt daer van gheseyt
Uan grooten druck moet ick vergaen.
En daghelijcx loop ick noch blinder toe
Uan v in al vertwyfeltheyt
En worde schier als een os oft coe
Sonder verstant oft eenich bescheyt
Eest dat ghy Heere noch langher beyt
En ick alleen wandele saen
Sonder dat ghy my selue leyt
Uan grooten druck moet ick vergaen.
Uergaen moet ick van grooten druck
Inder eewicheyt bederuen al
Aen my soo en is hulp noch gheluck
Soo veruaere ick in des duyuels val
Met sonden gheladen bouen ghetal
| |
[Folio I3r]
| |
En bliue eewich der wet ghevaen
Troost ghy my niet met bly gheschal
Uan grooten druck moet ick vergaen.
Waer blijft ghy troost eer ick bederue
Compt troost mi Uader eer ick sterue
Waer blijft ghy eer ick te gronde ga
Die eewighe doot hier daer ick sta
Ick en roepe niet dan gratie ghena
Ghenade cont ghy my weygheren niet
Ghi hebbet gheroepen vroech en spa
Compt alle tot mi die hebt verdriet.
Compt alle tot my die zijt belaen Ga naar margenoot+
Met swaren arbeyt zijt ghy ghequelt
Ick bent die niemant en wil versaen
Ick bent diet al in rusten stelt
Dit hebt ghi openbaer vertelt
Dit roept ghi ende en swijghet niet
Compt coopt sonder siluer oft ghelt
Compt alle tot my die hebt verdriet.
Hoe seer my Heer [st]aet [uwe wet]
Hoe seer si my tot hellen iaecht
Soo seer is si my weder omme te bet
Door hem die v soo wel behaecht
Die tot my spreeckt weest niet versaecht
Houdt vast op my en twyfelt niet
Ick bent die alleene v smerten draecht
Compt al tot mi die hebt verdriet.
|
|