Veelderhande schriftuerlijcke liedekens

57. Na die wijse. Soot beghint.

GHepeyns ghepeyns door fantasie
Hoe ligt ghy my nv so seere en quelt
Tsomwijlen truerich, tsomwijlen blie
O Heer helpt ons behouden dat velt ⁺
Compt coopt van my al sonder gelt
Wijn en melck na schrift verhalen ⁺
Sonder ghelt oft pant ghy en moecht niet falen.

Compt ghy belaste ick wil v ontladen ⁺
Spreect Christus de Heer int openbaer
Al met mijn vlees wil ick v versaden ⁺
Die in my ghelooft ende volcht mi naer
Uan diens lyue sulken vloeyen claer ⁺
Wateren des leuens elck merck dit snel ⁺
Blijft bi Gods woort soo doet ghy wel.

Wie het cruyce niet en wilt aenueerden
En treden inden enghen padt ⁺
Die en houdt Christus niet van weerden ⁺
Hoe sal hy comen in die nieuwe stadt
Want wie niet altemael en versaect pladt ⁺
Ulees, bloet, ere, goet, lijf, ende leuen ⁺
Die en sal Christus gheen erfdeel gheuen.

Maer die gheen deel met God en eruen ⁺
Beter mochten si ongheboren zijn
Als si dat nieu Ierusalem sullen deruen ⁺
En gaen al in die eewighe pijn ⁺
Dan sullen si alle weenende zijn
Als si door Gods woort haer oordeel ontfaen

+ ij.Cor.i.

+ Esai.lv.

+ Mat.xi.

+ Ioan.vi.

+ Ioan.vij.

+ Ioan.iiij.

+ Mat.x.

+ Mat.vij.

+ Ap.xxi.

+ Mat.x.xvi.

+ Mat.viij.

+ Luc.ix.

+ Ap.xxi.

[fol. G8r]

 

Die geen beteringhe en hebben ghedaen.

 

 

 

Bekeert v nv spreeckt Christus saen

 

Want dat hemelrijck is nv ghecomen by ⁺

 

Ghelooft Deuangelium die waerheyt neemt aen ⁺

 

Soo sal v die waerheyt maecken vry ⁺

 

Doet penitencie dat segghe ick dy

 

Als Petrus den Ioden verclaert ⁺

 

Ende volbrengt Gods liefde vermaert. ⁺

 

 

 

Siet wel toe en laet v niet verleyden

 

Als in deerste Corint int seste staet

 

Uan oncuyssche, en afgoden dienare beyden

 

Ouerspeelders, wreekelinghen, ende schenders quaet ⁺

 

Dieuen, en gierighe en dronckaerts opstinaet

 

En twistighe, en roouere, en moghen Gods rijck

 

Niet besitten, nv noch eewichlijck.

 

 

 

O lieue menschen wilt hier op mercken

 

Want sodanighe zijn wy al gheweest ⁺

 

Doen wy noch liepen in boose wercken

 

Maer want ons Christus daer af gheneest ⁺

 

Door die weder gheboorte somen dat leest ⁺

 

So wilt sober wesen in bedinghe waecken ⁺

 

Den ouden mensche moet ghy versaecken. ⁺

 

 

 

Weest altemael den Heer beuolen

 

Al die de nieuwe gheboorte aen staen

 

Ghelooft Gods woort ghy en sult niet dolen

 

Door de liefde sult ghy Gods rijck ingaen

 

Ende van Christo die croone ontfaen ⁺

 

Hy sal v verblyden met melodye

 

Die nv zijt beswaert sullen worden blye. ⁺

+ Mat.iiij.

+ Mar.i.

+ Ioan.viij.

+ Act.ij.

+ i.Cor.xiij.

+ Gal.v.
Eph.v.

+ i.Cor.vi.

+ Apoc.i.

+ Eph.v.

+ i.Pet.v.

+ Col.iij.

+ iiij.Esd.ij.

+ Ioan.xvi.