Veelderhande schriftuerlijcke liedekens


58. Een ander. GHesellekens vander rapenbloemen Laet ons bedriuen vruecht en spel Gods gheest die sal noch by ons comen Hy comt by ons want hy is snel Hy en macht niet laten, dat weet ick wel
[Folio G8v]
Hy siet alomme in zijn termijn Dat scheyden van Gods wtuercoren Tsceyden van dien dats deeuwyghe pijn. Ghelijck een bloemken seer wijt ontploken Soo moet ons herte nv gheschien Quaey fantasien laet zijn ghebroken En wilt v inden gheest verblien En wilt Gods liefde wel ouersien En schout verkeerde sinnen als fenijn Dat scheyden van Gods wtuercoren Tscheyden van dien dats deeuwighe pijn. Gods woort dat wort nv gans verheuen Ghelijck een bloem in haer bloeyen staet In Gods woort soo hanct der sielen leuen Tis ons soeter dan hoenich graet Cracht des vlees dit wel vaet Het licht v schoonder dan een robijn Dat scheyden van Gods wtuercoren Tscheyden van dien dats deeuwighe pijn. Prinche mijn Heeren en wilt niet trueren Al gheuoeldy in v den grooten strijt Groote gracie sal v ghebueren Al hebbens alle duyuels nijt Ghy wort van alle sonden quijt Ende Godt sal ons scencken der vruechden wijn Dat scheyden van Gods wtuercoren Tscheyden van dien dats deeuwighe pijn.