Veelderhande schriftuerlijcke liedekens

49. Een ander.

GHy Christenen verstaet wel mijn bediet ⁺
Die rijcke en acht den armen niet
Wat gaet ons Lucas vertellen
Die rijcke man die leckerlijck adt
Ende die den armen Lasarus vergadt
Die ley nv begrauen inder hellen.

Hy lach gestreckt voor zijn duer om Godt
Die Rijcke hiel daermede sinen spot
Hy en wilde niet ontbeeren
Doen quamen die honden//wilt dit door gronden
Van die tafel gheloopen in corte stonden
Ende leckte Lasarum zijn sweeren.

Die bedelaer is ghestoruen die doot
Uan Gods engelen geuoert in Abrahams schoot
Die Rijcke sterf oock in corter stont
Hy wert gheuoert inder hellen gront

+ Luc.xvi.

[fol. G1r]

 

Daer niet en is dan suchten ende beuen.

 

 

 

Daer hi lach inder pijnen groot

 

Sach hy Lasarum sitten in Abrahams schoot

 

Die rijcke en wil dit niet verghessen

 

Hi badt oft Lasarus mocht comen inder hellen gront

 

En doen een droppel waters in sinen mont

 

Om zijn tonghe van den heeten brant te lesschen.

 

 

 

Wanneer ghi de schriftuere wel doorsiet

 

Soo en mochtet hem ghebueren niet

 

Dit was tot zijnder onvroomen

 

Seynt hem dan int huys des vaders mijn

 

Daer noch vijf broeders van mi zijn

 

Dat si in dese tormenten niet en comen.

 

 

 

Abraham antwoorde hem die daer lach int verdriet

 

Si hebben Moyses ende Propheten hooren si die niet

 

Men sal Gods woort niet verdoouen

 

Al waert dat yemant vander doot verrees

 

Ende die hem dit altemael bewees

 

Sy en soudens oock niet gheloouen.

 

 

 

Prince Godt hier mede eijnde ick mijn liet

 

Het is warachtich aldus gheschiet

 

Lucas die heuet ons gheschreuen

 

Die bedelaer die daer badt zijn broot

 

Die rust nv daer bouen in Abrahams schoot

 

Die rijcke man bleef van Godt verdreuen.