Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij45. Na die wijse. Vant schouvagherken.EEn goet nieu liet al van beghin
Ga naar margenoot+
Dat sal ick gaen verclaren
Uan eenen Uader des huysghesin
Soo ons Lucas gaet openbaren
Twee sonen heeft hy behouden
Den outsten diende hem van passe wel
Den ioncsten was hem seer rebel
Alsoomen mocht beschouwen.
Hy sprack Uader zijt des wel vroet
Wilt my nv ouer gheuen
Al mijn patrimonie goet
Uan dat my is ghebleuen
Gheeft my dat sonder claghen
Het welck die Vader heeft ghedaen
Dat hy soude pelgrimagie gaen
En hem seluen wijsselijck draghen.
Als hy dat gelt hadde ontfaen
Wilt dit exempel onthouden
Hy heeft dat gelt terstont verdaen
| |
[Folio F4v]
| |
Al met die schoone vrouwen
Als hy zijn ghelt was quijte
Toghen si hem alle zijn cleederen wt
En lieten hem loopen als een schauuyt
Seer pouer van habijte.
Daer na quaem eenen dieren tijt
Dat hy met grooter pijnen
Moeste gaen eten des seker zijt
Wt den back al met die swijnen
Hy sprack met weenende ooghen
Wil ick weder tot minen Uader gaen
Oft hy my wil in ghenade ontfaen
Ootmoedicheyt betooghen.
Daer nae seer haestelijck met dien
Ghinck hy die reyse aenueerden
Ende viel neder op zijn knien
Ootmoedelijck ter eerden
Tot sinen Uader ghepresen
Ick hebbe teghen v soo vele misdaen
Wilt my als een huerlinck ontfaen
Ick en ben niet weert v soon te wesen.
Wanneer die Uader dat verstont
Ghinck hy zijn soon ontfermen
Ende wert verblijt in sinen gront
Ende nam hem in beyde zijn armen
Die Uader riep als doen ten tijden
Mijn soon die lang verloren was
Is nv gheuonden op dit pas
Wilt v met my verbliden.
Langt mijn sone dat beste abijt
Mijn vrienden wil ick nooden
Haelt sinen broeder met iolijt
Dat beste calf sal ick doen dooden
Verblijt v als nv ten stonden
Mijnen verloren sone die ick hebbe verwacht
Dwelck is dat menschelijck gheslacht
Dat Christus heeft gheuonden.
| |
[Folio F5r]
| |
Den outsten soo hoort mijn vermaen
Ghinck tot sinen Uader ghewaghen
Uoor mi (ick ben v onderdaen)
Hebdy noyt eenen bock gheslaghen
Doen sprack die Uader ghepresen
Van minen goede en hebdy gheen noot
Maer uwen broeder die was doot
Die is als nv verresen.
Al die met sonden zijn belaen
En wilt toch niet wanhopen
Maer wilt tot God den Uader gaen
Sijn gracie staet altijt open
Wilt v misdaet bekermen
Ende laet v sonden wesen leet
Want God is altoos bereet
Om den sondaer te ontfermen.
|
|