Veelderhande schriftuerlijcke liedekens(ca. 1552-1554)–Anoniem Veelderhande schriftuerlijcke liedekens– Auteursrechtvrij Vorige Volgende 21. Na die wijse. Van liefde comt groot lijden. BRoeders en weest niet verbolghen Die nv gheroepen zijt Om Christus na te volghen Uerblijt v in deser tijt En wilt v cruyce blydelijck ontfaen Om den Heere na te treden Hy is selfs voor ghegaen. Het is nv inden tijden Die schriftuere bewyset claer Wie Christum wilt belyden Hem volcht een cruyce naer Ghelijck aen Isebrant is gheschiet [Folio C8r] [fol. C8r] Hy stont vast op den Heere Die weerelt en vermocht hem niet. Isebrant mocht hy wel heeten Want het was sinen rechten naem Waer om dat suldy weeten God den Heere was hy bequaem Is [cout] was hy in afgodery Maer hy brande in Gods liefde De wercken ghetuychden dat vrij. Hadde hy die weerelt ghedient Soo hadde hem die weerelt gheloont Hy was die armer lieden vrient Dies is hy by God ghecroont Hy spysdese lichamelijck soot behoort En trooste altoos den crancken Al met dat godlijck woort. Den Paus en dede hy gheen profijt Met preken, dus wast hem verboden Vanden schriftgeleerden wert hy benijt Sy sochten raet om hem te dooden Als Paulus heeft in veel brieuen ghescreuen Ende die ghemeynte haer salicheyt Daer duer te kennen ghegeuen. Die gheschoren hebben vercreghen Mandement voor haer ghelt Wten houe van Skeysers weghen En bedreuen groot ghewelt Sy hielen raet met grooten hoopen Hoe zijt onnoosel schaepken Sijn vel af souden stroopen. Den sestienden dach in Meerte Soo wert Isebrant gheuaen Nader schriftgheleerden begheerte Moeste hy ten steen waert gaen Waer duere de ghemeynte seer was beruert Des anderen daechs by nachte Wert hy na Uiluoorden ghevuert. [Folio C8v] [fol. C8v] Uan Antwerpen wert noch een ghebracht Al op dat selue casteel Hy was gheuaen inder nacht Het cruyce was hem oock ten deel By name soo hiet hy Christiaen Christum is hy by ghebleuen Inder noot niet afghegaen. Uan Loeuen quamen scriftgeleerden Daer dees twee gheuaen saten En wilden wel dat si haer keerden Om Gods woorden af te laten Maer si zijn daer vastelijck by ghebleuen Alsoe ghy noch sult hooren Want het coste haer beyde tleuen. In Iulio de seuenthiensten dach Wert haer vonnisse af ghelesen Binnen Uiluoorden soomen sach Werden si ten brande verwesen Als si dit hooren bey ghelijck Vielen si op haer knien Dancten God van Hemelrijck. Nadat zijt vonnis hadden ontfaen Hebben si thien daghen gheleeft Wat die scriftgeleerden hebben ghedaen Haer werck getuyghenis gheeft Isebrant hantschrift hebben si begheert Wat si daer mede deden Wert noch hier na vercleert. Dus waren si te Bruessel ghebracht Elck op eenen waghen Soo si met haer hebben ghewracht Mochten si wel beclaghen Den onnooselen daer een vier bereyt En haer ghelijck slachscapen Alle bey ter doot gheleijt. Sy en mochten spreken niet een woort Soe werden si ter doot ghestout [Folio D1r] [fol. D1r] Seer deerlijck zijn si versmoort Uerdruct al onder thout Uerbrant tot poluer in heelen gloet Ons Heere wilt haer vergheuen Die sulcke iusticie doet. Wat si metten hanteecken bedreuen Dat muecht ghy nv verstaen Daer voor hebben si gheschreuen Dat hijt al was af ghegaen Sy beloghen hem seere ten was soo niet Hadden si twoort willen versaken Sy en waren ghestoruen niet. Dat hebben si doen wtlesen In Hollant in Brabant me Ten wert haer niet seer ghepresen Die sulcken werck oyt ghedee Dit hadden die scriftgheleerden beuolen Ghelijck si den wachters deden segghen Dat Christus was ghestolen. Int iaer van vierendertich Is dit te Bruessel gheschiet Bidt voor die daer zijn cleynhertich Datse God en wil verlaten niet Maer zijn gratie gheuen telcken termijn Dat si volstandich moeten blyuen Die noch niet ghestoruen en zijn. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij