Veelderhande liedekens, gemaect uut den Ouden ende Nieuwen Testamente

[VVaect op O menschen groot ende cleyne]

C Nae de wijse: Het naket eenen Mey, so lustelijck eenen Mey.

^‡VVaect op O menschen groot ende cleyne
Wilt niet meer slapen wie dat ghy zijt
Leeft na Gods woort, wt liefden reyne
Want het naect eenen so soeten tijt
^*Wie Tsheeren woort vrymoedich belijden
Voor dien naect een wel also grooten verblijden.

Sulck een so grooten verblijden

^†Die noyt ooghe en heeft ghesien
Noch noyt oore, tot gheenen tijden
En mochtet hooren, nae Schrifts bedien
Noyt menschen hert en mochter beghinnen
Dat geschiet die God van herten beminnen.

Dit Liet wil ick gaen dichten

‡ Ro. 13, 11.
Eph. 5, 14

* mat. 10, 32
Luc. 12, 8.

† esa. 64, 17
1. Cor. 2, 9

[fol. 348v]

 

Want dit is het begheren mijn

 

Oft ick yemant mochte stichten

 

^†Dat hy verliet allen boosen schijn

 

Dat Tsheeren woort in hem so mocht beclijuen

 

Dat hy den ouden Adam mocht wtdrijuen.

 

^‡ Den ouden mensch moet zijn verdreuen

 

^˜Opstaen in een goet nieu leuen fijn

 

Nae Tsheeren woort moeten wy leuen

 

Christo moeten wy onderworpen zijn

 

Al worden wy veruolcht soot mach blijcken

 

Verlaten wy hem niet, hy en sal ons niet beswijcken.

 

Op Gods edel woort wilt mercken

 

Al die daer duere gheroepen zijt

 

Weest neerstich tot goede wercken

 

^*Want nu so ist den bequamen tijt

 

^†Alle boom die niet en draecht goede vruchten

 

Wert afgehouwen, geworpen in deewich versuchten.

 

Christus gaet ons gewagen

 

Spreeckt totten volcke int openbaer

 

Die my lief heeft, die moet draghen

 

^‡Sijn daghelijcx cruyce, en volgen my naer

 

Maer hy moet hem seluen eerst versaken

 

^*De werelt met hare lusten moet hy laten.

 

De werelt gaet haer verstooren

 

Op alle die haer verlaten schier

 

^†Die van nieus worden gheboren

 

Wten water, Gheest ende vier

 

^‡Die verlaten de onvruchtbaer wercken

 

Werden veruolcht, gedoot, somen mach mercken.

 

^* Ghy sult om mijnen Name

 

Van alle menschen worden ghehaet

 

^†Maer die blijft in mijn woort bequame

 

Ick blijf in haer, toch elck dit wel vaet

 

^‡In de werelt sult ghy druck ende droefheyt lijden

 

De werelt sal haer in v droefheyt verblijden.

 

^* Christus spreect, en wilt niet meenen

 

Als dat ick vrede hebbe ghebrocht

 

Maer het Sweert, in dit dal van weenen

† 1. Tes. 5, 22

‡ Eph. 4, 22
Colo. 3, 9.

˜ Ro. 6, 4.

* 2. Cor. 6, 2

† mat. 3, 10 ende 7, 9.
Luc. 3, 9.

‡ mt. 16, 24.
mar. 8, 34
Luc. 9, 23.

* 1. ioan. 2, 15

† Joan. 3, 5.

‡ Esa. 59, 15

* mat. 10, 22 ende 24, 9.
mar. 13, 13.

† Joan. 15, 7

‡ ioan. 16, 33

* mat. 10, 34
Luc. 12, 51

[fol. 349r]

 

Daer en heb ick gheen vrede ghesocht

 

Hy en bracht geen vrede, dits claer beseuen

 

Maer het cruyce, ^† want hy heuet selue gedreghen.

 

Dit cruyce moeten wy draghen

 

Sonder versaghen, al doet ons pijn

 

^‡De knecht en mach tot gheenen daghen

 

Immers niet beter dan zijn meester zijn

 

Maer de knecht die is te vreden door desen

 

Dat hy ghelijck zijn meester mach wesen.

 

Daer staet noch also gheschreuen

 

Door Paulum, hoort zijn bedien

 

^*Wie dat Godsalich wil leuen

 

Die moeten alle veruolghinghe lien

 

^†Door veel drucx en tribulaci vroech of spade

 

Moeten wy Gods Rijck in gaen, door zijn ghenade.

 

^‡ Die arbeyt, coemt al vrymoedich

 

Die belast zijt ende belaen

 

Leert van my, ick ben ootmoedich

 

V siele suldy ruste vinden saen

 

Coemt tot my sonder versaghen

 

Neemt op mijn ioc, mijn last is licht om dragen.

 

^* Salich sidy, die nu weenen

 

Ghy sult noch lachen, maken iolijt

 

^†Wee die verhert zijn, als steenen

 

En die nu lachen, en zijn verblijt

 

Ghy sult noch weenen, en huylen door afgrijsen

 

Wee v, wanneer v alle menschen prijsen.

 

De quade werden ghepresen

 

^‡Maer die van nieus wt God geboren zijn

 

Werden ter doot verwesen

 

Also dat blijckt, nu op dit termijn

 

Sy worden gheacht, so cleyn van weerde

 

Als niet bequaem, tot Hemel, noch tot Eerde.

 

O ghy Christenen wilt v wachten

 

^*Weest toch voorsichtich in desen tijt

 

Voor Cain met sine gheslachten

 

Want op v zijn sy heel vol van spijt

 

Seer scherp so zijn haer bloedighe tanden

† Mat. 27, *
Mar. 15, *
Luc. 23, *.

‡ mt. 10, 24
Joan. 13, 16 ende 15, 20.

* 2. tim. 3, 12

† Act. 14, 12

‡ mat. 11, 28

* Luc. 6, 21.

† Luc. 6, 25.

‡ Joan. 3, 3.

* mat. 10, 24

[fol. 349v]

 

^†Aen donnosel bloet hebben sy besmet haer handen.

 

^* Donnosel bloet gaen sy vergieten

 

Also dat blijct nu voor ooghen wel

 

O Heere wanneer salt v verdrieten

 

Dat v volck sal lijden ghequel

 

^‡Alst ghetal veruult is, so wy lesen

 

Die noch om de waerheyt gedodet sullen wesen.

 

^* Ghy cleyn Hoopken, wilt v verblijden

 

Als ghy in kerckers en in banden coemt

 

Voor de waerheyt wilt vromelijck strijden

 

^†Want v verlossinghe naect in corter stont

 

Bewaert v Bruylofts cleet sonder smitten

 

^‡Want wie verwint, salt al besitten.

 

Ghy gheuangenen weest wel ghemoet

 

Laet Tsheeren woort in v volcomen zijn

 

Nae tsuer, so comet tsoet

 

^*Hebt goet betrouwen op den Heere dijn

 

So sult ghy oock haest troost verweruen

 

^†Salich zijn de dooden, die inden Heere steruen.

 

Dit Liet is nu gheschoncken

 

Hoort alle vrienden groot ende cleen

 

Laet Gods woort in v herte voncken

 

^‡Fondeert v vast op den verworpen Steen

 

^*Hy is de steen, daer wy wt moeten drincken

 

Wt liefden wil hy ons zijn genade schincken.

 

O Prince, Godt der heyrscharen

 

Bewaert v volck verre ende naer

 

Aenhoort toch tsuchten van uwe dienaren

 

^†Al die verstroyt zijn hier ende daer

 

Sterct ons in alle ons benouwen

 

Met uwen geest O Heere wilt ons bedouwen.

† Esa. 1, 15. ende 59, 3.
4. esd. 1, 26

* psa. 79, 3
1. ma. 7, 17
4. esd. 15, 8

‡ apo. 6, 11

* luc. 12, 32

† Luc. 21, 26

‡ Apo. 21, 7

* Eccli. 2, 6.

† apo. 14, 13

‡ 1. Pet. 2, 5

* 1. Corin. 10, 4.

† 1. Pet. 1, 1.