Veelderhande liedekens, gemaect uut den Ouden ende Nieuwen Testamente

[VVy die des Heeren Ghemeynte zijn]

C Nae de wijse: Wy die Jan tachters kinders zijn.

VVy die des Heeren Ghemeynte zijn
Sullen wy noch lange moeten trueren
In dese woeste werelt, vol van fenijn
Daer willen ons de woluen verschueren
Om dat wy niet meer
En doen nae hare leer
O ghenadighe Heer
^*Sterct ons ghelooue tot allen vren.

Als wy deden nae de blinde leyders raet

Doen waren wy by haer ghepresen
Maer nu wy verlaten de boosheyt quaet
So worden wy by haer verknesen
Daer wy waren lief en weert
En zijn wy niet meer begheert
Om Gods woort expeert
Sijn wy berooft, veruolcht, ter doot verwesen.
^† O waerheyt hoe sidy nu vertreen
De luegen wert voor v ghepresen
Wie hem vanden boosen niet en laet verleen
Die moet nu alle mans beroouing wesen
Dat louter is en claer
Dat en mach niet voorwaer
Comen int openbaer
Somen in Esaias mach lesen.
^‡ De werelt die is in boosheyt ghestelt
Dat machmen wel vry wtspreecken
De liefde is gheworden als sneeu die smelt
Dat mach elck sien aen al haer treecken
Van haer zijn wy benout
O God diet al aenschout
^*Wie op v betrout
En liet ghy noyt in ghebreecken.

O Heer onsen strijt, die is so groot

* Luc. 17, 5.

† Esa. 59, 15

‡ 1. ioan. 5, 19

* Eccli. 2, 12

[fol. 347v]

 

Die ons aencoemt van alle zijden

 

De werelt, ons vleesch, Duyuel en doot

 

Die comen ons nu al bestrijden

 

O Heer maect ons bequaem

 

Dat wy den strijt weerstaen

 

^*En uwen Naem

 

Voor de werelt vroom moghen belijden.

 

O Heer wilt stercken onsen Gheest

 

^†Dat wy toch wettelijcken moghen vechten

 

^‡Teghen Draeck, Propheet en de erge beest

 

Die soecken v vergadering te slechten

 

Daer zijnder noch al meer

 

Die nu benijden seer

 

V Leden teer

 

Wilt ons den strijt wt helpen rechten.

 

Ons vianden die comen ons dapperlijc aen

 

O Heer aenhoort toch dit ghewaghen

 

Tcasteel onser sielen willen sy verraen

 

Daer toe legghen sy groote laghen

 

O Heer gheeft ons cracht

 

Sijt met ons op de wacht

 

Dach ende nacht

 

Dat wy ghetrouwe blijuen tallen daghen.

 

De Vorsten deser werelt zijn seer verstoort

 

^*Op v cleyn hoopken, ick moet oock claghen

 

Door Skeysers placaet werden sy vermoort

 

V cruyce moeten sy oock draghen

 

Maer v Beloften schoon

 

Die zijn so recht ydoon

 

^†Des leuens croon

 

Die doet dat wy ons niet en versaghen.

 

Ons veruolghers die zijn so putertier

 

Also dat elck nu mach aenschouwen

 

Sy moorden met water, sweert ende vier

 

Sy doen wat sy connen om ons benouwen

 

Maer ons God die siet seer snel

 

Op die ons doen ghequel

 

Hy salt wreecken wel

 

Als hy het oordeel sal comen houwen.

* mat. 10, 32
Luc. 12, 8.

† 2. Tim. 2, 5

‡ apo. 12, 22

* Luc. 12, 32

† Sap. 5, 17
4. es. 2, 43
2. tim. 4, 8
1. Pet. 5, 4
Jaco. 1, 12.
Apo. 2, 10

[fol. 348r]

 

^‡ Wy werden alst gout int vier gheproeft

 

Met tormenten groot, gaetmen ons quellen

 

Pijne, druck, noot, wert ons toeghevoecht

 

De waerheyt moet ons tleuen gellen

 

Men maect ons naect en bloot

 

O Heer in onsen noot

 

Thoont v ghenade groot

 

Dat wy al ons vianden moghen vellen.

 

Het is ons al van te voren gheseyt

 

Tot Timotheum ist gheschreuen

 

Dat haer het cruyce wert opgheleyt

 

^*Al die Godtsalich willen leuen

 

Door druck en verdriet

 

Dat ons nu hier gheschiet

 

Also men siet

 

^†Sal ons Godt de croon des leuens gheuen.

 

O Princelijck Vader van eeuwicheyt

 

Wilt al ons benautheyt aenschouwen

 

^‡Ons toeulucht hebben wy tot v gheleyt

 

^*Op v alleene is al ons betrouwen

 

O Heer door uwen Gheest

 

Maect ons heel onbeureest

 

In dit foreest

 

^†Dat wy ons croone moghen behouwen.

‡ psa. 66, 10
Pro. 17, 3.
Sac. 13, 9.
Sapi. 3, 5.
Eccli. 2, 5.
1. Pet. 1, 7

* 2. tim. 3, 12

† 4. es. 2, 45

‡ Psal. 90, 1

* Psa. 7, 2. ende 17, 2. ende 18, 3. ende 144, 2.

† apo. 3, 11.