Veelderhande liedekens, gemaect uut den Ouden ende Nieuwen Testamente
(1582)–Anoniem Veelderhande liedekens–
AuteursrechtvrijC Na de wijse: Il me suffit de tous mes maulx.
Ga naar margenoot*VVel salich is hy die God vreest
En daer toe oock sonder swijcken
Hout zijn Gheboden minst en meest
En daer by blijft sonder afwijcken
Want hy sal eten, zijnder handen werck
En allesins vrolijck wesen
Vroom sal hy oock wesen en sterck
En God louen, hooghe gepresen.
Ga naar margenoot† Sijn huysvrouwe met oueruloet
Sal den wijnstock wel zijn gheleken
Die vruchten brengt voort metter spoet
Tot haren tijt schoon onbesweken
Noch bouen dien, sal hy wesen certeyn
Int ronde zijns huys vercoren
Als een chieraet, lustich en reyn
Dit iont hem God, tot zijn orboren.
Sijn kinders oock ghebenedijt
Als nieuwe olijfboomen iuechdich
Sullen oock staen, ter seluer tijt
Int ronde zijnder tafelen vruechdich
Sulck ghebenedijden sal ontfaen
Van God de Heer goedertierich
Die hem vreest, sonder wederstaen
En hem bemint, met herten vierich.
Ga naar margenoot‡ God wil ons oock al door zijn cracht
Die in Sion woonen waerachtich
Ghebenedijen dach ende nacht
Met gheestelijcke gauen machtich
Want zijn natuer is oprecht en goet
Dies hy eeuwich sonder cesseren
Jerusalem weldaden doet
Dus laet ons in hem iubileren.
|
|