Veelderhande liedekens, gemaect uut den Ouden ende Nieuwen Testamente

[Vader God van grooter waerdt]

C Na de wijse: Vader ons in Hemelrijck.

VAder God van grooter waerdt
^†Ghy die den Hemel en de aerdt
Door uwe machte hebt gewracht
Een wonderlijcke stercke cracht
^‡Een vaste Fondament gheleyt
Op den water wijt wtghespreyt.
^* Ghy die waert van eeuwighen tijt
Inden beghin ghy gheweest zijt
^†En blijuende tot eeuwicheyt
Vwen Naem is wijt wtghebreyt
Sonder eynt, ia sonder beghin
Sijt ghy gheweest, so ick beuin.
^‡ Daer toe zijn wy gheworden siet
Door uwe hant ghemaect van niet
Van der Aerde, mede van slijck
^*Gras en groen cruyt zijn wy ghelijck
Als een bloem des velts nu bloeyt
En door den winde wert verstroeyt.
^† Ghy weet O Heer, hoe cleyn wy zijn
Van crachte voor uwe aenschijn
^‡Ons vleesch dat is gheneghen boos
Tot quaetheyt ghewillich seer loos
^*Ende en hebben van ons niet
Goet te doen, iae te dencken siet.
^† Dus vlie ick tot v, Heere soet
^‡Ghy die zijt wesentlijck goet
^*Gheneghen om te vergheuen
^†Een vader des lichts verheuen
^‡Sonder v is gheen salicheyt
^*Want ghy zijt wech, Leuen, waerheyt.

Ick bidde v met Salomon

^†Om gheen lanck leuen noch rijckdom
Niet om mijnder vianden doot
Maer dat ick door v ghenaey bloot

† Gene. 1, 1.
Psal. 33, 6
Colo. 1, 16
Heb. 11, 3.

‡ Job 38, 6
psa. 136, 6.

* Mic. 5, 1.

† apo. 1, 18

‡ Gene. 2, 7.

* Psa. 90, 5. ende 103, 15.
Esa. 40, 6.
1. pet. 1, 24
Jaco. 1, 10.

† apoc. 3, 8

‡ Gen. 6, 5 ende 8, 21.

* 2. cor. 3, 5

† ps. 143, 9.

‡ psa. 118, 1

* esa. 55, 7.

† dan. 2, 22
Jaco. 1, 17

‡ act. 4, 12.

* ioan. 14, 6

† 3. re. 3, 10

[fol. 333v]

 

Mach bekennen wat v wil sy

 

^†Ende een ghehoorsaem hert daer by.

 

^‡ Want ick bemin v wech met vliet

 

Door v Ghenade, op ons siet

 

O Heer my uwe wet verclaert

 

Ons toch in v leere bewaert

 

So dat ick wt v woort mach saen

 

Meer vruecht als wt de werelt ontfaen.

 

Dat ick v lof Heer, mach cont doen

 

^†En oock uwe woorden behoen

 

Die nemmermeer vergheten fijn

 

^‡Want ht woorden des leuens zijn

 

^*Waer door de siele wert gheuoet

 

Heere op v padt bewaert mijn voet.

 

Neycht my (O Heer) tot v ghebodt

 

Ghy die zijt een leuendich Godt

 

My leuendich maeckt op v pat

 

Toont my toch v verborghen schat

 

Want uwen wech behaget my

 

Maect my toch los, van sonden vry.

 

^† O Heer, van wiens ghenade goet

 

Alle het Aertrijck oueruloet

 

Leert my nu doen dat v behaecht

 

Stelt toch v woorden onuersaecht

 

Dat sy my uwer vreesen Heer

 

Vermanen, om te houden seer.

 

^‡ V woort is een keers mijnder treen

 

Een licht van onse paden reen

 

Leert my onderhouden v woort

 

Dat ick door v cracht met accoort

 

Sonder ontsien haeste my snel

 

V te dienen, en niemant el.

 

Op dat ick byden goeden fijn

 

Door uwe cracht mach staende zijn

 

Want ghy zijt Heere mijn erfdeel

 

Ick heb voor ghenomen heel

 

Van herten om te wandelen hier

 

Nae v woort, en nae v manier.

† 3. reg. 3, 9.

‡ ps. 119, 35

† psa. 119, 38

‡ Joan. 6, 68

* Deu. 8, 3.
Mat. 4, 4
Luc. 4, 4

† ps. 119, 64

‡ ps. 119, 105